بحمد الله وصلت مساء الامس الى القاهرة
مش عارف ليه اول مرة انزل مصر في حياتي ..وانا مش مبسوط ..
حسيت بانقباض كبير في قلبي ... وتساؤل بيقول ..انا جيت ليه
مش عارف ليه ..بس حبيت اسجل اول انطباع لي
تحياتي
الجمعة, 03 اغسطس, 2007
السبت, 26 مايو, 2007
كيفكم ياحلوين ... المفروض اني كتبت البوست ده من اسبوع .. لكن نعمل ايه .. الكسل
من اسبوع ..لأني رجعت الى الخبر يوم الخميس 17 مايو ...
اخر حاجة سبتكم فيها كان المفروض اني مهاجر تاني يوم لباريس .. عاصمة النور ...
وكنت ناوي اكتب هنا عن تفاصيل الرحلة يوم بيوم
لكن ... وتحتها مية خط ... بكل اسف .. يبدو انو فيه ناس كانت متتغاظة من سفرتي دي ... لان ظهري والفقرات اشتغلوا بشكل كبير جدا ... لدرجة اني ماكنتش قادر اتحرك ... فقضيت الفترة اللي فاتت تقريبا في الفندق ..للراحة
نزلت باريس فعلا يوم الجمعة ... ونزلت يومها تمشيت في الشانزلزيه ... لغاية مانكسر ظهري ..ورجعت لغرفتي ....
شفت المسلة المصرية .. متحف اللوفر ... قوس النصر العظيم :) ... ورجعت متكسر للفندق
تاني يوم اصريت اني اروح لبرج ايفل ... وركبت المركب في رحلة جميلة .... ورجعت بدري بدري للغرفة ريحت فيها لتاني يوم ...
اخدت القطار ... ومباشرة في اتجاه جنيف ... وصلت العصر ... نزلت البحيرة على طول .. شيء جميل جدا .. الناس كلها على البحيرة ...
اخدت كرسي ..وجلست استمتع بالجو الجميل ... وفي نهاية اليوم ركبت مركب في رحلة برضه لمدة ساعة ...
وطبعا في راحة الى ثاني يوم ... واصبح الامر كله عمل في عمل .. الى المكتب ..وعودة الى الفندق ..
الى يوم الاربعاء عصرا ..ذهبت الى القطار ..رجعت الى باريس ... والخميس الظهر ركبت الطيارة عائدا الى البحرين ... ومنها الى الخبر
والحمد لله على كل حال .. نعوضها المرة الجاية
موقفين حصلوا معايا في الرحلة دي .. حابب اكتب عنهم للذكرى :)
=========================
وانا ماشي في الشانزلزيه ... في ساعة عصاري ... وباتفرج على المحلات والناس ... والمطر نازل يرخ على دماغي ومش معايا مظلة ... انتبهت لوش مش غريب علي ... مين .. معقولة ... كان واحد وجنبه وحدة محجبة ... انا ركزت عليه طبعا علشان اتأكد من الوش ... انتبه لي ... ركز هو كمان في وشي ... ضحك وانا ضحكت
قلتله يعني مانشوفش بعض الفترة دي كلها ... ونتقابل في الشارع العظيم ده ...
كان احد زملائنا في سكن المستشفى العسكري .... علي البلوي ... اخدت اخباره .. وعرفت انه بيحضر الدكتوراة في الطب ..في فرنسا .. وده اول يوم له في فرنسا ... واللي معاه كانت زوجته .. اللي طبعا اختفت اول مااتهبت انه في حد من السعودية يعرف زوجها موجود :) <=== عمرهم ماهيتغيروا :D
بالتوفيق ياعلي ...
===========================
في جنيف .. اول يوم رحت اتعشى في مطعم موفنبيك ... اكلت وجبة السمك المفضلة ... وطلبت الايسكريم البلاك فورست الجميل ...
انتبهت كده ان قطع الشوكولاته عليها نقط كأنها نقطة ماء .. طلبت الهانم وسألتها ايه ده .. قالتلي ده زي الشربات بيتنقط على الشوكولاته ... قلتلها تأكدي الله يخليكي ..راحت ورجعت ..وقالت متأكدة .. قلت طيب ..
توكلنا على الله ... وأكلنا ... الطعم فعلا غريب ... والريحة اغرب ... انا قلت اكيد الايسكريم ده معفن ... رحت ناديت على الهانم .. وقلتلها انتي متأكدة انه الايسكريم ده خالي من اي مواد كحولية ... راحت .. ورجعت مديرة المطعم بتشيل الطبق ...
فيه ايه .. قالت احنا اسفين ..بالغلط اضفنا نكهة من الكحول لطبقك .. ياولاد اللذين ..هي العفانة دي كانت كحول
طبعا هم قالوا ده ارهابي ..وهيفجر المطعم :) ... طبعا انا عصبت شوية .. لاني كنت حاسس وطلبت ان الهانم تتأكد ..ورجعت بكل ثقة تقول متأكدة ...
عموما ..قلتلها حصل خير ... هاتي غيره ..هاكله يعني هاكله ...
راحت المديرة ..ورجعت الهانم بالطبق ..وهي يعني شوية وتعيط ... ومعلش انا اسفة .. ماكنتش عارفة ... اصلي انا يهودية وعارفة ايه معنى ان الحاجة تكون محرمة ..
يخرب بيت شيطانك .. يهودية كمان .. يعني جاية تفرحيني بجمال خطوتك والا ايه
قلتلها ياستي حصل خير .. مافيش مشاكل .. واكلت طبقي بالهنا والعافية ...
ودفعت الفاتورة من غير مايحسبوا الايسكريم علي ...
كنت فاكرهم المعفشنين مش هيحسبوا حاجة خالص :p
وتوتة توتة خلصت الحدوتة
نراكم في رحلات اخرى ان شاء الله
الخميس, 10 مايو, 2007
ها ياجماعة .. معايا والا ضعتوا زيي
ركبت القطار فعلا في الموعد ... حبيت اريح راسي شوية ..ضبطت ساعة الجوال على الموعد اللي مكتوب عندي للوصول ... ونمت شوية
صحيت على الموعد .. واستنيت اسمع المذيعة الداخلية بتقول اسم المدينة .. لقيتها رطنت من غير ماتقول الاسم ..قلت يادي النيلة ..في ايه .. كلمت اللي جنبي ..طلع مايعرفش عنجليزي ... بس فهمني وفهمت منه اني لازم انزل واخد قطار تاني ..
لاحول ولا قوة الا بالله ..ليه كده بس ... نزلت .. وفعلا كلامه صح ..بس القطار التاني على الساعة 5 ..والساعة الان 3 ونص ... والمحطة صغنطوطة ...
اتكلت على الله ..وشفتلي حاجة كلتها ... لغاية القطار التاني ماوصل ... وخلال نص ساعة كنت في Blois
المفروض اني لو عارف طريقي اكون فيها من الساعة 11 ظهرا ... لكن معلش .. مافيش حاجة بالساهل
طلعت من المحطة ... خمس دقايق لغاية ماوصل تاكسي .... ووصلت الفندق آمنا .. Mercure
كلمت زميلي اللي في المصنع هنا .. واتفقنا يعدي علي بعد نص ساعة ..وفعلا وصل ورحنا البيت عنده تناقشنا شوية في الشغل .. لغاية ماكلمونا مجموعة تانية وصلت ..فرحت انا وهو للمطعم اللي اتفقنا عليه ..واتعشينا عشوة حلوة ...
رجعنا الفندق ... ونمت زي القتيل ...
تاني يوم ..صحيت على 8 ..فطرت ..رحت المصنع ..اجتماعات .. لغاية الساعة 6 ... رجعت الفندق ..على طول على المطعم اللي تعشينا فيه المجموعة كلها ..حوالي 30 واحد ...
رجعت ..نمت .. صحيت متأخر ..8 ونص ..مافطرتش ..طلعت المصنع على طول .. اجتماعات . حجزت الفندق في باريس ... وبكرة ان شاء الله احجز للقطار ...
رجعت الفندق ... لفيت البلد شوية ...خدت شوية صور ... لقيت مطعم عربي .. تعشيت فيه .... رجعت الفندق ..سبحت نص ساعة .. اشتريت بطاقة نت ..واديني معاكم اهه :)
سريع سريع .. صح
نراكم غدا ان شاء الله على خير
الثلاثاء, 08 مايو, 2007
ماأجمل العلم القرنسي اللي مزين ردودي في جيران :)
انا الان في مطار باريس ... انتظر القطار اللي هيوديني ان شاء الله الى Blois .. المدينة اللي المفروض اقضي فيها الاربعة الايام القادمة ان شاء الله
تركتكم بالأمس وانا متوجها الى مطار البحرين ... ووصلت بالفعل حوالي الساعة 12 مساء
انهيت اجراءات الصعود الى الطائرة .. وبكل اسف كنت من اخر الركاب ..فمالقيتش مكان الا في النص ..ربنا يعين اللي جنبي
دخلت صالة المطار .. وانتظرت الرحلة ... الساعة 1:45 موعد اقلاعها
اكلت في المطار وجبة ناجتس خفيفة ... وتمشيت شوية .. الى ان جاء وقت الصعود الى الطائرة .. الساعة 1:15 تقريبا
كعادتي .. طلعت اخر واحد .. ولقيت كالعادة واحد مستولي على الكرسي بتاعي ... فقلتله من فضلك الكرسي ... استعبط .. قال الكرسي ده بتاعي .. اللي جنبي هو اللي بتاعك
بيني وبينكم .. كان فيه بنوتة جنب الكرسي بتاعي .. وهو داخل جو معاها ... فقلت والله لاخرب عليكم :p
قلتله لو سمحت ..الكرسي بتاعي ... طبعا كان هيغتالني .. وساب الكرسي ..وانا قعدت وكنت حاسس ان الاتنين هيغتالوني ...
المهم .. الرحلة كانت جميلة ... مش علشان البنوتة اللي جنبي ..علشان ماحسيتش بال 7 ساعات خالص ... كلها كانت نووووووووووووم .
عوضت سفر اليومين اللي فاتوا ... وتعبهم
ولاول مرة اركب طيارة ماكلش فيها حاجة ...
صحيت على الهبوط ... .. نزلت الظيارة .. وبكل اسف ..برغم النداءات والرجاءات .. كل الناس لازم توقف اول ماتنزل الطيارة وتستقر امام البوابة
مش عارف ليه ..نفسي افهم ... بيفضلوا واقفين لغاية كل اللي قدامهم مايمشوا ..وقفوا والا قعدوا ..هيمشوا لما يجي الدور عليهم ...
كنت فاكر احنا بس اللي بنعمل كده ..لكن اكتشفت انه مرض عالمي :)
المهم نزلت من الطيارة ..الساعة 8 بتوقيت باريس
مش عارف حاجة في اي حاجة .. سألت ودلوني على محطة القطار بالعافية
الرحلة الى Blois الساعة 1:45 ظهرا .. والساعة كانت 9 ونص ..
قلت مش مشكلة ..ياترى استنى في المطار والا اطلع اشوف باريس
بصراحة شنطي اللي معايا خلتني افضل الانتظار في المطار ..وكمان علشان النت اللي لقيته بلوشي ده .. طلعت اللاب توب ..وهاتك يانشاط :)
رغم اني عارف لو دورت هلاقي حاجة زي خزنة كده احط فيها شنطي واطلع اتمشى شوية في باريس
لكن مافيش مشاكل ..الجمعة والسبت في باريس ان شاء الله
وهاانا اكتب لكم من محطة القطار ... وباقي ساعتين تقريبا
صعصع الطويل ... محطة القطار ... باغي
الاثنين, 07 مايو, 2007
خلال 30 دقيقة بإذن الله ..سأتوجه الى مطار البحرين ... كي استقل طائرة ال Gulf Air
متوجها الى باريس ... في بداية لرحلة تستمر ان شاء الله لمدة 10 ايام ... الى فرنسا ..ومن ثم سويسرا
ان شاء الله هاحاول اكتب عن الرحلة وانا هناك ..
بس قولوا يارب :)
اتمنى انكم تسامحوني جميعا .. انا عارف اني باغلط في ناس كتير ..اصلي مدب :)
نراكم على خير
الجمعة, 10 نوفمبر, 2006
منذ رحيل أمي عن الدنيا ..وأنا عازم على بأداء العمرة لها رحمها الله
ومع قدوم خالتي ..حماتي .. الى مكة لأداء العمرة في رمضان ..والانتظار لاداء فريضة الحج أيضا . وجدتها فرصة لأداء العمرة .. ثم السلام عليها وزوجها .. ونخلي العيال يشوفوا جدهم وستهم .. ويعملوا عمرة لأول مرة
وفعلا ..يوم الأربعاء قبل الاماضي ..بتاريخ 1 نوفمبر ..تحركنا باتجاه مكة المكرمة مع احدى الحملات المتوجهه من الخبر
خفت اطلع بعربيتي ..يكون ممنوع دخول المحرمين الى مكة في هذا الوقت ..وكمان لان المسافة طويلة شويتين
كانت الرحلة ميسرة والحمدلله .. وقمنا أربعتنا بأداء العمرة ... كل واحد ونيته
يعني يارهف وياروان ..دي اول مرة تروحوا فيها مكة ..وتعملوا فيها عمرة
أحرموا معانا ..وقاموا بأداء جميع مناسك العمرة زيي انا وامهم
السكن اللي كان الحملة متعاقدة عليه كان تعبان جدا ..فاضطريت اني اشوف فندق حلو وسكنا فيه .. وفعلا الراحة في المبيت لا يعدلها راحة
لم نستطع رؤية جد وجدة البنات ..بسبب احتياطات أمنية :)
خيرها في غيرها ..الأهم وعملناه طبعا
وعدنا الى بيتنا سالمين فجر يوم السبت 4 نوفمبر
يارب يتقبل
الجمعة, 27 اكتوبر, 2006
بدأت الرحلة عند الساعة الثالثة فجر يوم الخميس 19 أكتوبر .. الموافق 27 رمضان
شغلنا السيارة ..وتوكلنا على الله ... الطريق حوالي 900 كلم ..مناصفة بين أراضي السعودية والامارات
عند السابعة والنصف صباحا كنا قد وصلنا الحدود وانهينا اجراءات الخروج والدخول ... وانتقلنا من حال الى حال
سبحان الله .. فرق شاسع بين الطريق من الخبر الى الحدود ..وبين الطريق من الحدود لدبي
يكفي ان الاستراحات داخل الامارات تغنيك عن كل شيء .. جمال ونظافة .. وفيها كل حاجة
لكن في السعودية .. الله يعين بس ..
وصلنا دبي .. الى بيت أخي .. عند الواحدة والنصف بتوقيت الامارات ... ابويا كان لسة هناك ..كان فاضل ليه ساعة ويطلع المطار عائدا الى الرياض .. كويس ان احنا لحقناه وشفناه
=======================
أيام ماقبل العيد لم يكن فيها الكثير من النشاطات .سوى المولات والبحث عن الجديد :)
=======================
أول ايام العيد .. كان ابن بطوطة له نصيب البداية فيه ... وفيلم عمارة يعقوبيان .. اللي شفتها مرتين قبل كده .. لكن الموت مع الجماعة رحمة :)
وبعدين غدوة حلوة في مطعم جميل ..نسيت اسمه .. وسهرة عائلية حلوة بعد كده في الليل
======================
ثاني ايام العيد انتقلنا الى كورينش الفجيرة .. ممتعة الجلسة كانت .. وشفنا الصيادين وهم بيطلعوا السمك اللي اصطادوه .. ولعبنا في الرمل والماء .. وشوية طاولة وكوتشينة ..
مع المشاوي .. كان يوم لذيذ فعلا
=======================
ثالث يوم العيد كان مخصوص لأولاد اخي .. فسحة مخصوصة لكل واحد منهم ..فسحة لعمرو ..شفنا فيها فيلم .. وفسحة لسميرة ..وفيلم كمان
=========================
ثم كانت رحلة العودة .. والتي بدأت عند الساعة الحادية عشر ظهرا ..يوم الخميس ... ووصلنا البيت الساعة السابعة مساء بتوقيت المملكة
رحلة جميلة فعلا ..وكل عام والجميع بخير
السبت, 07 اكتوبر, 2006
أكيد وحشتكم ..صح .. <== ولا حد اصلا انتبه انك غايب
ماعلينا
قررت قضاء اجازة نهاية الاسبوع الماضي .. 5 و 6 أكتوبر .. أنا وأسرتي ... في رحاب مدينتي الحبيبة ..الرياض
مسقط رأسي .. وحاملة رفات أمي
آخر مرة نزلت فيها الرياض كان منذ خمسة أسابيع .. وقت وفاة الوالدة رحمها الله
المهم
الرياض هي عاصمة المملكة العربية السعودية .. تقع في وسط المملكة .. وتبعد 400 كم غرب مدينة الخبر التي أسكن فيها حاليا
تحركت من الخبر عند منتصف ليلة الخميس .. ووصلت بيت أخي الأصغر حوالي الساعة الثالثة والنصف ..قبيل صلاة الفجر
طبعا يادوب صليت ونمت .. من تعب السواقة
ذهبت الى المقبرة عصرا .. ودي ليها موضوع خاص ان شاء الله ..احكي فيها اللي حصلي في المقبرة <== شوية وكان هيرجموني :)
ثم الافطار عند الوالد حفظه الله .. بصحبة أخواي المقيمان في الرياض وأبنائهما .. قصدي ابناء واحد بس :)
وفي الليل سهرة جميلة مع العائلة ..
الجمعة .. صليتها في الجامع القريب من المقبرة .. ثم زرت أمي رحمها الله مجددا ..
ورجعت بعد كده نمت شوية ..علشان فيه سكة سفر في انتظاري ..
قبيل السفر ..توجهت لتناول الإفطار .. في استراحة جمعية النادي المصرية .. ولقاء الأحبة الذين لم أقابلهم منذ شهر فبراير الماضي
وبعد وقت جميل قضيته معهم .. توجهت عائدا الى بيتي من جديد ...
وانتهت رحلتي الى الرياض .. رحلة قصيرة .جميلة جدا ...
شفت فيها الأهل ..والأصدقاء ..والأحبة
وكل رحلة وانا وانتم بخير :D
<<الصفحة الرئيسية
