اللهم لك الحمد والشكر
عدت الى بيتي سالما بعد انتهاء العملية .. والله مانا عارف اسميها عملية والا ايه :)
بعد ماكتبت مقالي امبارح ... رحت المستشفى ... وطبعا كالعادة لازم تطلع حاجة تحرق الاعصاب
الممرضة لما شافتني .. انت جيت ليه ..هو انا مش قلتلك الثلاثاء .. الدكتورة مش هتقدر بكرة ..
قلتلها باقولك ايه ..انا مش ناقص هزار ... يالا هاتي ورقة الدخول وخلينا نخلص ..قالت انا باتكلم جد ..الدكتورة عندها بكرة حالة مستعجلة ومش هتقدر تعملك العملية ...
قلت لاحول ولا قوة الا بالله .. قولي للدكتورة بتاعتك انا اصلا كنت ناوي انزل مصر يوم الاثنين ... نشوفها على خير لما ارجع من مصر ...
الدكتورة سمعت صوتي العالي ... فنادتني ... قالتلي جاهز ... قلتها جاهز لايه .. قالت مش عمليتك بكرة ... بصيت للمرضة نظرة حقد ... الممرضة قالت يادكتورة انتي مش قلتي مش هتقدري بكرة ...
المهم طلع ان الممرضة هانم ملخبطة ..والدكتورة كان قصدها واحد تاني ....
خلصت اجراءات الدخول .. على الساعة 8 تقريبا كنت في سريري ... طبعا تحاليل دم وحرارة و ضغط والذي منه ... وبعدين حلقو ظهري :( ... وقالوا لي ممنوع تاكل او تشرب من الساعة 12 مساء ..العملية الصبح الساعة 8 ونص ان شاء الله
كان معايا كتاب الدكتور غازي ..حياة في الادارة ... استغليت الفرصة ..وقعدت اقرا فيه ... نمت وانا باقرأ فيه ... مش عارف الساعة كام ... صحيت على الفجر ... كنت شبعان نوم .. بعد الصلاة كملت قراية الكتاب ..لغاية ماخلصته الحمد لله اخيرا :) ... ممتع جدا
كانت الساعة 7 ونص صباحا ... طبعا وصلوا .. واخذوا الحرارة والذي منه .. واعطوني اللبس بتاعي .. وحبوب بلعتها ... ولبست لبس العملية ونمت على السرير ...
على الساعة 8 ونص جابوا السرير اللي هينزلني للعملية ... ونزلوني لغرفة العمليات ... خلوني استنى شوية ... وبعدين دخلوني الغرفة ... استقبلتني دكتورة التخدير ..وشرحتلي ان البنج هيكون موضعي ... بس هيدوني جرعة تخليني انام .. وحطوا الاوكسجين على فمي ... شوية دخلت الدكتورة .. سلمت وازيك والكلام ده ... وجاهز ..قلت نتوكل على الله
بدأت احس بشك في ظهري .. الظاهر كان البنج ... لانه بعد شوية مابقتش حاسس كتير بظهري ... وبدأت احس بشكات دبوس ورى بعض ... وواضح اني نمت بعد كده .. لاني صحيت وهي بتقول خلصنا الغضروف الاول ..وهنعمل التاني دلوقتي ... ورحت في غيبوبتي تاني ..بس كنت حاسس المرة دي تقريبا زي الحلم .. نايم وصاحي ...
مش عارف عدى كام من الوقت ..لقيتهم بيقولوا خلاص ..مبروك خلصت ...
بصيت على الساعة كانت 11 تقريبا ...
شكرا يا دكتورة ..وشكرا للبقية .... تحولت للسرير اللي جابني من فوق تاني ... وخلوني على جنب شوية ..مش عارف كام ..الظاهر لغاية ماافوق ...
بعد شوية طلعوني الغرفة ... وبعد ساعة جابوا الاكل .. طبعا كنت جعان جدا .. كلت الحمد لله ..ونمت تاني .. صحيت على الم في ظهري ورجلي اليمين ... قالوا معلش هي كده اول فترة ...
نمت تاني ... وصحيت على المغرب ...لقيت الالام خفت جدا ... والعشا موجود ..كلت برضه :)
الدكتور وصل ..كشف ..وقالي لة عايز تفضل ممكن ..ولو عايز تمشي ..امشي ...
قلتله اروح بيتي احسن ...
وفعلا كان .. رجعت البيت سايق عربيتي زي مارحت سايقها والحمد لله
طبعا مش هاقدر احكم على حاجة لسة ... لما يعدي كم يوم ربنا يسهل
والحمد لله على فضله ونعمته ... والحمد لله على سلامتي :)
بصراحة كنت فاكرها أصعب من كده .. لكن ماحستش فيها .. اللحمية اصعب منها مية مرة .. ربنا يبارك فيها الدكتورة ..ويجعل الشفاء في اللي عملته يارب
مبروك ياسيدي وحمدالله ع السلامة وماتشوف شر ونراك قريبا