الاثنين, 30 يوليو, 2007
اللهم لك الحمد والشكر
عدت الى بيتي سالما بعد انتهاء العملية .. والله مانا عارف اسميها عملية والا ايه :)
بعد ماكتبت مقالي امبارح ... رحت المستشفى ... وطبعا كالعادة لازم تطلع حاجة تحرق الاعصاب
الممرضة لما شافتني .. انت جيت ليه ..هو انا مش قلتلك الثلاثاء .. الدكتورة مش هتقدر بكرة ..
قلتلها باقولك ايه ..انا مش ناقص هزار ... يالا هاتي ورقة الدخول وخلينا نخلص ..قالت انا باتكلم جد ..الدكتورة عندها بكرة حالة مستعجلة ومش هتقدر تعملك العملية ...
قلت لاحول ولا قوة الا بالله .. قولي للدكتورة بتاعتك انا اصلا كنت ناوي انزل مصر يوم الاثنين ... نشوفها على خير لما ارجع من مصر ...
الدكتورة سمعت صوتي العالي ... فنادتني ... قالتلي جاهز ... قلتها جاهز لايه .. قالت مش عمليتك بكرة ... بصيت للمرضة نظرة حقد ... الممرضة قالت يادكتورة انتي مش قلتي مش هتقدري بكرة ...
المهم طلع ان الممرضة هانم ملخبطة ..والدكتورة كان قصدها واحد تاني ....
خلصت اجراءات الدخول .. على الساعة 8 تقريبا كنت في سريري ... طبعا تحاليل دم وحرارة و ضغط والذي منه ... وبعدين حلقو ظهري :( ... وقالوا لي ممنوع تاكل او تشرب من الساعة 12 مساء ..العملية الصبح الساعة 8 ونص ان شاء الله
كان معايا كتاب الدكتور غازي ..حياة في الادارة ... استغليت الفرصة ..وقعدت اقرا فيه ... نمت وانا باقرأ فيه ... مش عارف الساعة كام ... صحيت على الفجر ... كنت شبعان نوم .. بعد الصلاة كملت قراية الكتاب ..لغاية ماخلصته الحمد لله اخيرا :) ... ممتع جدا
كانت الساعة 7 ونص صباحا ... طبعا وصلوا .. واخذوا الحرارة والذي منه .. واعطوني اللبس بتاعي .. وحبوب بلعتها ... ولبست لبس العملية ونمت على السرير ...
على الساعة 8 ونص جابوا السرير اللي هينزلني للعملية ... ونزلوني لغرفة العمليات ... خلوني استنى شوية ... وبعدين دخلوني الغرفة ... استقبلتني دكتورة التخدير ..وشرحتلي ان البنج هيكون موضعي ... بس هيدوني جرعة تخليني انام .. وحطوا الاوكسجين على فمي ... شوية دخلت الدكتورة .. سلمت وازيك والكلام ده ... وجاهز ..قلت نتوكل على الله
بدأت احس بشك في ظهري .. الظاهر كان البنج ... لانه بعد شوية مابقتش حاسس كتير بظهري ... وبدأت احس بشكات دبوس ورى بعض ... وواضح اني نمت بعد كده .. لاني صحيت وهي بتقول خلصنا الغضروف الاول ..وهنعمل التاني دلوقتي ... ورحت في غيبوبتي تاني ..بس كنت حاسس المرة دي تقريبا زي الحلم .. نايم وصاحي ...
مش عارف عدى كام من الوقت ..لقيتهم بيقولوا خلاص ..مبروك خلصت ...
بصيت على الساعة كانت 11 تقريبا ...
شكرا يا دكتورة ..وشكرا للبقية .... تحولت للسرير اللي جابني من فوق تاني ... وخلوني على جنب شوية ..مش عارف كام ..الظاهر لغاية ماافوق ...
بعد شوية طلعوني الغرفة ... وبعد ساعة جابوا الاكل .. طبعا كنت جعان جدا .. كلت الحمد لله ..ونمت تاني .. صحيت على الم في ظهري ورجلي اليمين ... قالوا معلش هي كده اول فترة ...
نمت تاني ... وصحيت على المغرب ...لقيت الالام خفت جدا ... والعشا موجود ..كلت برضه :)
الدكتور وصل ..كشف ..وقالي لة عايز تفضل ممكن ..ولو عايز تمشي ..امشي ...
قلتله اروح بيتي احسن ...
وفعلا كان .. رجعت البيت سايق عربيتي زي مارحت سايقها والحمد لله
طبعا مش هاقدر احكم على حاجة لسة ... لما يعدي كم يوم ربنا يسهل
والحمد لله على فضله ونعمته ... والحمد لله على سلامتي :)
بصراحة كنت فاكرها أصعب من كده .. لكن ماحستش فيها .. اللحمية اصعب منها مية مرة .. ربنا يبارك فيها الدكتورة ..ويجعل الشفاء في اللي عملته يارب
الاحد, 29 يوليو, 2007
أتوجه الان الى المستشفى ... سأقضي الليلة هناك .. وغدا صباحا ستكون العملية ان شاء الله
سامحوني ..وادعوا لي
السبت, 28 يوليو, 2007
بدأ يومي باتصال من مهندس الوكالة ..يخبرني فيها ان السيارة اصبحت جاهزة .. يومين بدري قبل ميعادها .. ايه الجمال ده ..شكله اليوم ده اخباره جميلة من اوله ان شاء الله ...
لبست وطلعت الوكالة ... اخذت العربية .. وطلعت على المستشفى اشوف ايه الحكاية مع الدكتورة
قالتلي ان القطعة هتوصل الرياض بكرة الصبح ان شاء الله ... والاثنين صباحا هتكون في الخبر ... ماسألتش بصراحة ليه جاية على الرياض مش على الخبر ... مابقتش تفرق معايا .. ضاع حجز الاثنين وانتهينا ... وحجز الخميس والجمعة انتظار .. يعني ممكن يطلع كله في الباي باي
قلت مش مشكلة ..ربنا يسهلها من عنده .. يعني يادكتورة اخر كلام الاثنين ... قالت لا ..الثلاثاء ان شاء الله يكون كل حاجة جهزت ... طيب يادطتورة انا مسافر الجمعة .. قالت ياريت تأجلها ..واذا كنت مضطر هاديك اسم دكتور في مصر تراجعه ..زقلت ممتاز ..كده كلام جميل
مشيت وسبتها .. رجعت البيت ... وطبعا اتغديت ونممممممت ...
صحيت على اتصال من الشركة بيقولوا لي ان التأشيرة اصبحت جاهزة .... يامسهل وادي تاني خبر او تالت خبر حلو النهاردة ... على اعتبار خبر القطعة اللي هتوصل يوم الاثنين ده خبر حلو :)
كلمت السكرتير وهياخد الجواز ويجيبه لي ان شاء الله .... وبكده يكون خلصنا من التأشيرة ..ومعانا التذاكر .... فاضل ايه ... الحجز ...
شوية وتجيني رسالة على الموبايل ... تم تأكيد حجزك ياريت تتصل تأكد التأكيد ... قلت ياسلام ..انا قلت يوم الاخبار الجميلة ده
اتصلت ... لقيت ان خحز الخميس تأكد والحمد لله .. لغيت حجز الاثنين ..وسبت حجز الجمعة انتظار ... وعملتلي حجز انتظار عودة يوم 27 .. لو حبيت اخد اسبوع زيادة في مصر ... مانا مريض بأى وندلع شوية على الشركة
يعني بحمد الله كام حكاية خلصت النهاردة ... واصبحت الامور اوضح قليلا بإذن الله
الثلاثاء نعملها ... الخميس حاليا نسافر ... .. واذا ربنا اراد يكون السفر يوم الجمعة
انا لسة مش متخيل ازاي هاعمل عملية واقدر اسافر خلال يومين ... بكرة نشوف
تحياتي
الجمعة, 27 يوليو, 2007
1 يناير 2003م
تركتكم وانا قد حصلت على ترقية في شركتي الحالية .. واصبحت استشاريا ... وحصلت على زيادة في راتبي بعد أن كان الراتب ثابتا لم يتغير منذ اول زيادة حصلت عليها في اول شركة عملت بها في بداية عام 1999م
كثرة انتقالتي بين الشركات لم يكن فيها انتقال لمرتب أكبر ..كان هو نفس الراتب .. والسبب بسيط ..انني لم اكتسب خبرة حقيقية في احدى الشركات التي عملت بها قبل شركتي الحالية ..
كلها كانت وظائف فقط من اجل الحصول على راتب اخر الشهر .. ولكنها من جهة الخبرة ..لاتضيف الكثير
وهي نصيحة لكل الشباب .. عندما تتخرج من الجامعة ..انتظر قليلا ..ولاتستعجل العمل في اي مكان من اجل الحصول على المال ... لكن ابحث عن الوظيفة التي تعطيك الخبرة والمهنية العملية .. وان اضطرتك الظروف للعمل من اجل المال .فلاتجعل هذا العمل منتهى طموحك ..وابحث بجدية عن العمل المناسب لحياتك المهنية
عموما .. نعود الى الترقية ... التي صاحبها باب جديد فتحه الله للشركة ... من خلال توقيع عقد مع 3 شركات في المنطقة الشرقية ... والتي لم يكن لنا تواجد فيها ... وكوننا في فرع الرياض الاقرب لهذه المنطقة .. ومع انهائنا جميع المشاريع الموجودة في الرياض .. كنت انا وزميلي المرشحين الوحيدين للقيام بتلك المهمة ..
في البداية ..كنا نذهب الى الشرقية مرة اسبوعيا ... ننجز مهمة ..ونعود الى الرياض بقية الاسبوع نحضر لما سننجزه الاسبوع القادم ... وعند الحاجة نجلس في الشرقية فترة لاتزيد عن اسبوع ...
كان الامر مرهقا .. لنا وللشركة ... أدمّنا طائرة السابعة صباحا من الرياض الى الدمام ..وطائرة العاشرة مساء من الدمام الرياض كل سبت ...
خلال تلك الفترة وبالتحديد في شهر مارس 2003 .. كان موعدنا مع قدوم عروستي الحبيبة .. روان ... ولولادة روان حكاية ..كتبت عنها سابقا ... http://abdutaweel.spaces.live.com/blog/cns!4C447F1F063598A4!294.entry
المهم انها شرفتنا بتاريخ 21 مارس 2003م ... ترجيتها انها تنولد في يوم 19 مارس ...يوم مولدي ... لكنها أبت الى ان تأتي بعدي بيومين كاملين :)
مع تقدم الامور في المشاريع الثلاثة ..أصبح تواجد استشاريين في المنطقة الشرقية لانجاز المشروع امرا مهما ..وتم عرض الأمر علي انا وزميلي
لو كان هذا الامر حدث منذ 3 اشهر فقط ..لكنت قد رفضت رفضا قاطعا .. فأمي واختاي مازالا معي ..وتواجدهم في الرياض أمر مهم جدا ... ولن ارحل الى الدمام واتركهم في الرياض ...
لكن ..بعد عودتهم الى مصر ... أصبح الامر اسهل بكثير ... بالرغم من كوني مازلت اكتب في رسالة الماجستير ..وتواجدي بجانب المشرف على الرسالة كان امرا هاما ... لكني ومن أجل الخبرة التي سأكتسبها في تلك المشاريع الثلاثة قررت الموافقة والانتقال للعيش في المنطقة الشرقية ..
ومع نهاية شهر يونيو 2003 ..حدث الانتقال فعلا ... لنسكن في شارع الملك سعود في الدمام .. في مكان هو الأقرب بالنسبة لي من مكان عملي .. عشر دقائق مشي :)
ساعد على هذا القرار كما اخربتكم ..عودة امي واختاي الى مصر مع عدم وجود اي التزامات مدرسية ..
واخيرا الخبرة التي كنت ارجوها من هذه المشاريع ...
كانت المشكلة الوحيدة في هذا الانتقال ..هي رسالة الماجستير ... وكان الحل في ان انزل الرياض للالتقاء بمشرفي كل اسبوعين ... من اجل عرض ماوصلت له عليه ... واخذ التعليمات لما سأقوم به خلال الفترة القادمة .. كان الامر متعبا ... لكنه يستحق التعب
مرت الأمور بسلام ... كان العمل في البداية متعبا ..لأننا بدأنا المشاريع الثلاثة في نفس الوقت .. وانهماكي في الدراسة من جهة أخرى كان عاملا مهما في أن لااتفرغ لبيتي أبدا في تلك الفترة ..
وللمرة الثانية .. تقف ام فارس معي وقفة الزوجة الصالحة ..حماها الله من كل سوء ... وتتحمل تلك الفترة دون ان تتذمر او تشعرني حتى بأي شيء .. لم تشتكِ يوما ..ولم تبدِ تذمرا أبدا .. ساعدتني في تهيئة الجو والبيت لعملي ودراستي ... وتحملت تلك السنة العصيبة معي دون ان تكل او تمل ..بارك الله فيها وجزاها عني خير الجزاء
كانت تلك السنة الدراسية .. 2003 - 2004 ..اخر السنوات الدراسية بالنسبة لي ..وعليّ الانتهاء من تقديم البحث خلالها .. والا فاتني ركب الماجستير ..واضطر للدخول في التبريرات والواسطات كي يسمحوا لي بسنة أخرى نهائية .. ولم أكن أنوي أبدا ان اصل الى ذلك الامر .. لذا اجتهدت في رسالتي ... وواظبت على زيارة مشرفي ...
ولا انسى هنا ان اشكر رئيس القسم من جديد .. فعندما علم بانتقالي الى الشرقية ..عفاني من مهمة التصحيح .. ودعا لي بالتوفيق ... جزاه الله كل الخير ..ووفقه وأهله لكل خير
انتهى العام 2003م ... والامور في تقدم جميل على المستويين العملي والعلمي ... كنا قد انهينا مشروع من المشاريع الثلاثة ... واقترب المشروع الثاني من الانتهاء ... والثالث قطعنا فيه شوطا جيدا ...
ومعنى هذا ان ضغط العمل خف كثيرا ..وتفرغت لرسالتي بشكل أكبر ...
مرّ عام 2003 بتطورات مهمة ... بنوتة جديدة .. وانتقال الى مدينة جديدة ... وترقية وزيادة في الراتب .. واكتساب خبرات مهمة جدا في عملي .. كانت الاساس في حياتي المهنية فيما بعد
استطيع ان اطلق عليه ...عام التغيير ... عام اكتشاف الذات
نراكم في العام 2004 ... الذي كان عام الحرية بكل معنى الكلمة
الخميس, 26 يوليو, 2007
مرت الأيام سريعا .. بالأمس بدأت البطولة الآسيوية ... والان أصبحنا على مشارف النهائي
كانت البداية مع الانتقادات اللاذعة للمنتخبات العربية المشاركة .. وأنها ستكون لقمة سائغة في أفواه المنتخبات شرق آسيوية
وبدأت البطولة بمفاجآت ثقيلة من الفرق المغمورة ... أصحاب الأرض ... تايلند تتعادل مع العراق .. وفيتنام تتغلب على الامارات و إندونوسيا تتفوق على البحرين .. ثم يعيد تايلند التفوق لاصحاب الارض وثفوز على عمان
كل هذا حدث في اولى أيام البطولة ... مما جعلني شخصيا افقد الحماس لمتابعة هذه لبطولة .. فقدت الأمل في كل الفرق العربية ماعدا الفريق السعودي ...
فبالرغم من كل الانتقادات التي واجهها في البداية بسبب تشكيلته الشابة .. ذات الخبرة المتواضعة ... الا ان فريق يملك مالك وياسر في الهجوم ... والمسيليم في الحراسة ... يستحق أن تثق فيه ... وفي أنه قادر على تحقيق الانجازات
عادت الحياة للبطولة بالنسبة لي عندما تغلبت العراق على الفريق الاوروبي الاسترالي ... وعندما تفوقت السعودية على اصحاب الارض .. اندونيسيا ... كاسرا بذلك تفوق اصحاب الارض على الفرق العربية
وأصبحت الامال منعقدة على ثلاث فرق عربية ... السعودية والعراق وقطر ...
لم تستمر قطر طويلا .. فلقد أبت الامارات الا ان تغرق .. وتشدها معها نحو القاع .. وانتهت المرحلة الاولى من البطولة ... لتتأهل ثمان منتخبات الى دور الثمانية ... من بينها فريقان عربيان فقط ... السعودية والعراق
وكانت المفاجأة في خروج منتخب الصين ... وقطر والامارات ... من الدور الأول ... وصعود فرق فيتنام واوزباكستان نيابة عنهم
جاءت مباراة العراق في دور الثمانية أسهل نسبيا من نظيرتها السعودية ... فالعراق ستقابل فيتنام .خارج أرضها ... والسعودية ستقابل اوزباكستان ... ليتأهل الفريقان الى دور الاربعة
ليواجها فريقان مرشحان لنيل البطولة بشكل كبير ... كوريا الجنوبية ... واليابان ...
بالطبع أصبح الامل في أن يكون النهائي عربيا كبيرا جدا ... لكن .. وكعادة المحللين .. كانت كوريا واليابان المرشحتان الاساسيتان للوصول الى النهائي ... ولكني كنت أرى ان العراق والسعودية قادرتان على الوصول الى النهائي
وبالفعل .. وصلا الى النهائي ... وأجمل مافي وصول السعودية أنه كان على يد مالك المرعب :)
لنصبح الان على موعد مع النهائي .. يوم الأحد القادم ..
شخصيا .. محتار جدا بين مين اللي اشجعه في النهائي
أتمناها عراقية .. فهم يستحقون الفرحة دون شك ... ولكن من داخلي اتمناها سعودية ... وسأفرح أكثر لو فازت السعودية
لكن بالتأكيد اني سلإارح أيضا لو فازت العراق
ومبروووك للفريقين
الاربعاء, 25 يوليو, 2007
انا عارف اني دوشتكم باللي باكتبه ده ... لكن الهدف الاساسي من مدونتي هو رصد لكل لحظات الحياة المختلفة .. خصوصا تلك اللحظات التي تحتوي على أحداث معينة مختلفة قليلا عن الاحداث اليومية العادية
لذا كان تركيزي على كتابة كل مايحدث معي في هذه الفترة .. ... فاعذروني :)
==================
يوم الاثنين اخذت الموافقة على عمل الرنين المغناطيسي للمرة الثانية ... الالة الان مختلفة ..فهي هولندية ..والمفروض انها ادق من الالة الصينية التي استخدموها معي في المرة الاولى ...
الجميل ان شركة التأمين دفعت قيمة الرنين المغناطيسي للمرة الثانية ... كنت متوقع انهم يرفضوا .. الرقم مش قليل ..
عموما .. اتصلت بيهم يوم الاثنين صباحا علشان اخد موعد .. كان في دماغي ان الموعد اقصاه هيكون عصر اليوم ... لكن فوجئت بأن أقرب موعد يوم الخميس ... ياجماعة انا مسافر ..ولازم اعملها بسرعة علشان نشوف الدكتورة هيكون قرارها ايه ... قالوا للاسف مافيش أمل
لم ايأس ... لبست وركبت عربيتي ورحتلهم ... طبعا استغربوا ..قالوا احنا قلنالك .. قلتلهم ياجماعة لازم تشوفوا حل ..فين المدير نتفاهم معاه ... وانا باتلكم معاهم اتصلت بيهم المريضة اللي كان موعدها خلال دقائق ..اتصلت واعتذرت عن الموعد وطلبت اعادة جدولته .. قلت ياسبحان الله نصيبي :) ...
وفعلا دخلت ... الالة مختلفة شوية عن الالة السابقة .. دي مغلقة أكتر .. مفتوحة من عند الراس والقدم فقط ... التانية كانت مفتوحة من كل الجهات ... نمت ودخلوني جوة الالة ... خمس دقايق ..لقيتهم بيطلعوني .. في ايه ياجماعة ..قالوا مش راضية تشتغل ... هنعيد تشغيل الجهاز ..ارتاح شوية ..
عملوا اعادة .. وجربوا كمان من غيري ..واشتغلت...دخلت تاني ..وبرضه نفس الكلام ..مش شغالة .. طلعوني برة وقالوا نجرب حالة تانية .. وانت ارتاح شوية....اشتغلت مع الحالة التانية .. يادي الحظ ... اشمعنى طيب ... قالوا نجرب اخر مرة ..
دخلت الجهاز ... سمعت صوتها ..يامسهل .. اشتغلت .... عشر دقائق ..طلعوني تاني ... فيه ايه ؟ قالوا مش شغالة كويس ..الصورة وحشة ... تعال بكرة الساعة 7 نكون خدنا رأي الفنيين ...قلت طيب ..واضح انه ماليش نصيب ... لكن الساعة 7 كويس ..يعني لو خلصت بدري لسة هاقدر اراجع الدكتورة بدري ..واذا فيه حاجة هتقررها يكون فيه وقت اعمله الاربعاء ...
وفعلا ..رجعت المستشفى يوم الثلاثاء الساعة 7 صباحا ... دخلت القسم ..مافيش حد .. فيه ايه .. لقيت فني مناوب موجود .. قالي الدوام الساعة 8 ... ياجماعة بيضحكوا علي والا ايه ... امري لله ..انتظرت لغاية ماوصلوا الباشوات الساعة 8 ونص
فيه ايه ..انتو مش قلتوا الساعة 7 .. قالوا ايوة ..7 مساء ... نعم ..مساء ..يعني مش هاشوف الدكتورة الا يوم الخميس .. ده متأخر جدا .. قالوا معلش مافيش موعد فعلا دلوقتي ..ووروني جدول المواعيد .. زحمة جدا ..
قلت هاستنى يمكن تخلصوا واحد بدري بدري والتاني يتأخر ..ادخل انا .. قالوا براحتك .. بس صدقنا مافيش أمل
قعدت وانا تعبان ..عايز اناااام :) وطبعا شغال ادعي يارب ماحدش ييجي ...
مريض الساعة 8 ونص كان موجود من الساعة 8 ... الموعد التاني على 9 .. والتالت على 10 .. قلت يامسهل التاني يخلص بدري وادخل انا في النص ...
دخل مريض الساعة 8 ونص ... وصلت الساعة 8:45 ... وصل مريض الساعة 9 .. كان رجل وامرأة ..واضح ان الست هي المريضة .. قلت في نفسي ياخسارة .. أملي في مريض الساعة 10 :) او ان الامور تمشي بسرعة ..
لكن للاسف ..مش ماشية بسرعة ..المريض اللي جوة لسة ماطلعش ..والساعة دخلت على 9:10 ... فقدت الأمل خلاص ..وفكرت اني امشي .. استنيت شوية .. طلع الباشا الساعة 9:15 ... والباشا اللي دوره الساعة 9 كان جدا زعلان ..أخرتوني ربع ساعة ... دخلت الهانم ..وانا خلاص هامشي ... فوجئت بالباشا بيصوت .. أخرتوني ربع ساعة ..ولسة كمان الحكاية هتاخد نص ساعة .. انا ماعنديش وقت ... خلاص مش عايز ..
قلت يافرج الله ... من عندك يارب :) ... وفعلا طلعت الهانم ومشيوا ... رحت انا ليهم وانا ابتسامتي من الودان للودان ... طبعا هم كمان كان بيضحكوا وقالوا انت محظوظ جدا ..لكن ياريت بس تشتغل النهاردة ..
قلت يارب ... ربنا يسهل ... المرة الاولى ماشتغلتش ... لكن الحمد لله اشتغلت في المرة الثانية ..
خلصت على الساعة 10 .. وعلى طول على الدكتورة ... كانت ماشية هي كمان ..قلتلها معلش لازم تشوفي النتيجة .. شافت النتيجة والحمد لله كانت الصور بالنسبة ليها اوضح
طمنتني ان الحالة فعلا مش متأخرة زي ماهي كانت شاكة ... وان العملية مش ضروربة الان ... ممكن تبدأ معايا بعملية حقن للغضروفين المتأثرين بمادة تعيد الحياة ليهم .. وتخليهم يرجعوا زي ماكانوا
المشكلة واضحة جدا في غضروفين .. مابين الفقرة الثالثة والرابعة ... ودي أكدت ان المرض لسة في اوله فيها ..والحقن هيجيب نتيجة أكيدة ان شاء الله ..وترجع طبيعية على طول
اما الغضروف اللي بين الفقرة الرابعة والخامسة ..هو اللي مشكلة شوية .. وهو اللي طالع برة شوية .. لكن هتجرب الحقن معاه ... وهي متفاءلة انه هيستجيب ويرجع طبيعي ان شاء الله
قلتلها طيب يادكتورة ..وهاحتاج 6 اسابيع راحة برضه بعد العملية ..قالت لا ابدا ..ترجع شغلك تاني يوم ..
قلت الحمد لله .. يالا نعملها بكرة ... قالت مافيش وقت ومش عارف ايه ..طبعا ماسبتهاش ... قالت طيب نشوف الاول اذا كان مقاس الابرة المناسب ليك موجود والا لا ... اتصلت ولقيت مافيش ...
قلتلها ياريت تحاولي معاهم يجيبوها بكرة ..هاستناكي ..وعدتني خير ..وقالت بالكتير هنعملها السبت ...
طبعا انا هاعتمد على حظي الجميل :) ومن الصبح هاكون عندها فوق راسها ان شاء الله ... على امل اني اعملها النهاردة وانزل مصر في وقتي يوم الاثنين
وبكده انتهينا من حكاية الفقرات ...
ندخل في حكاية العربية <===== يوووه هو لسة فيه حكاوي :)
طلعت من المستشفى على المرور ..معايا التسعيرات من المعارض .. هتكلف 1500 ريال ... رفرف جديد بس ..طبعا هيحتاج فرن علشان اللون
انا كنت ناوي في النهاية اعملها في الوكالة ..هاخد المبلغ ده واحط من جيبي واعملها في الوكالة ...
خلصت من المرور ..وطلعت على التعاونية للتأمين علشان اسلمهم المطالبة بالمبلغ ... فوجئت انهم معترضين على التسعيرة بتاعة قطع الغيار ... ليه ياجماعة ..قالوا دي من غير خصم ..والاكيد انك بتاخد عليها خصم ... ياجماعة دي تسعيرة رسمية ..والمرور موافق عليها .. انتو عليكو تدفعو وبس .. <=== مع الاعتذار للواو :)
طبعا ماعندوش صلاحيات الباشا ..قلتله مديرك فين يابني ... دخلت على المدير ..ولقيت نفس الكلام ..فيه ايه ياجماعة انتو بتستهبلوا .. قالوا لو مش عاجبك سيب الورق واحنا هنخاطب المرور ونرفض الرقم اللي هم كتبوه ..
المبلغ اللي كان عايزين يخصموه حوالي 100 ريال .. بس مشكلتي مش مع المبلغ ..مشكلتي مع المبدأ ..
المهم انا اتنرفزت وقلتله ياخي كويس ان الواحد كشفكم على حقيقتكم وان شاء الله مش هاجدد تأميني معاكم ..
هو سمع الجملة دي ..وقالي هو انت مأمن شامل معانا ..قلتله ايوة ... قالي ياخي خلاص محلولة ... عليك نسبة خطأ في الحادث .. قلتله لأ ..قالي خلاص ممتاز نصلحها ليك على التأمين بتاعك في ورشنا ..وانسى حكاية التسعيرات دي كلها ..ومش هتدفع حاجة
قلنله ياسلام ..انا تأميني معاكم تصليح وكالة ..وعربية بدلية وقت التصليح .. قالي خلاص نعملها في الوكالة ونديك عربية بديلة ...
قلتله خلاص ياسيدي توكل على الله .. والحلو كمان انه مافيش نسبة تحمل خالص لاني مش غلطان في الحادث ..
رحت الوكالة ... هتكلف كام ياجماعة ... 1800 ريال .. طيب كويس .. كم يوم ..5 ايام ..أجرنا عربية ب 500 ريال ... يعني المجموع 2300 ....
وانا مش دافع حاجة من جيبي ... واللي رفض يدفعلي 1500 ريال ..هيدفعلي 2300 ريال
شفتوا الذكاء :)
بس كفاية
السبت, 21 يوليو, 2007
الأحداث كثيرة اليومين دول ... هي ديما كده ... لما يكون الانسان مشغول بحاجة ..تلاقي مية حاجة تانية بتحصل
علشان انظم الامور بس ... انا الان مشغول بايه
1- نزولي مصر يوم 30 يوليو ..
2- كتب كتاب أخي يوم 4 أغسطس
3- الام الظهر .. والعملية ... وفين هتتعمل ومع مين
4- مؤخرا ... عربيتي الغلبان ... والخبطة اللي اكلتها النهاردة
الاحداث ..
الصبح رحت المستشفى ..وخليت شركتنا تدخل كمان في الموضوع ... وانتهت الحكاية بأن شركة التأمين وافقت ... بس رفضت الدكتور ده ..وقالت تعلمها عند اي احد تاني
امامي اكثر من خيار الان ...
اعملها في نفس المستشفى بس عند دكتو اخر .. علشان اكون دقيق هي دكتورة ... بيقولوا عنها ممتازة ..بس انا مش ناوي اسلم ظهري لدكتورة بصراحة
ان المستشفى تاخذ الموافقة من التأمين على الدكتورة ...بس اللي يعملها لي الدكتور
او اني اروح اي مستشفى تاني في المملكة ..واعملها عند اي دكتور اختاره ..
او اني اعملها في مصر ...
الخيار الاخير يبدو الافضل ... بس انا شغال على اني اعملها عند الدكتور بتاعي ... لأن اسمه فعلا متميز في هذه النوعية من العمليات ... اذا مانفعتش ..هيكون خياري التاني اني اعملها في مصر
هاتعب لغاية مااعرف اعملها فين وعند مين في مصر ... بدأت اشتغل من الان بسؤال الدكتور اللي كنت كلمتكم عنه سابقا ... ونشوف كده على نهاية اليوم ايه اللي هيحصل ان شاء الله
المهم ..في خضم كل تلك الافكار ... وانا واقف امام مطعم الفول والطعمية ..مطعم هاشم ..علشان اخد ساندويتش طعمية وعلبة ميرندا ... فوجئت بالباشا اللي راجع علي بعربيته وهو نايم في العسل .. اضربله كلكس .. او بوري :) ولا هو هنا ... لغاية مالبس في العربية الباشا ...
الحمد لله هي خفيفة جدا ... لكن المشكلة في وقت الانتظار لغاية الدورية ماتيجي ... وصل بسلامته بعد ساعة .. خد الرخص والاستمارة وطلب ان احنا نروح للمركز .. رحنا المركز استنينا ساعة كمان ..لغاية ماشرف ومعاه التقرير
طبعا وضعوا الغلط على الباشا 100% ... لكن مش هنا المشكلة ...
المشكلة انه انا اللي هاضيع بعد كده في عمليات تسعير عملية التصليح ..وبعدين الركض وراء شركة التأمين بتاعت الباشا علشان اخد منها المبلغ اللي هيتم تسعيره ...
وعيش ياعبدالرحمن في الدوامة اللي ماكنتش على البال ولا على الخاطر
بس كفاية :)
تشاو
الخميس, 19 يوليو, 2007
1 يوليو 2001م .
بداية عملي مع الشركة الرابعة منذ تخرجي من الجامعة بتاريخ 31- ديسمبر 1997م.
لا أنكر في البداية أن هذا العمل كان هو البداية الحقيقية لي في مشوار بناء حياتي المهنية .. ماسبقه كله كانت اختيارات خاطئة .. لم تكن تأخذ بعين الاعتبار الحياة المهنية ... فقط كانت تهتم بالحياة المادية فقط ..
هنا كانت مرحلة جديدة من التعلم والعطاء ...
بعد 3 اشهر من التحاقي بالعمل ..بدأت التطبيق الميداني كأخصائي في مجالي مع الاستشاري الموجود في الشركة .. المشروع جديد ... وبدأت التعلم ...
كنت وقتها مازلت ادرس في اخر فصل دراسي في الماجستير .. ولا املك الوقت الكبير الذي اقضيه في العمل ...
وطبعا الامور مش لازم تمشي بشكل وردي
الاستشاري باشا ذهب الى بلده في اجازة نهاية السنة الميلادية ... ولم يعد ... وأصبحت أنا وزميل لي اخر اقدم مني في وجه المدفع ... كان من المفترض ان كلانا سيتعلم في هذا المشروع من الاستشاري ..كي ننطلق بعد ذلك في عالم الاستشارات ...
وحدث مالم أكن متوقعه أيضا ..وللمرة الثانية
زميلي لم يعجب الشركة التي كنا نطبق لديها ... وطلبت الشركة ان يتنحى عن المشروع .. وان استكمل انا المشوار .. كان تحديا كبيرا ... وثقة أكبر ...
كنت قد انهيت الفصول الدراسية الثلاثة ... وحصلت على معدل امتياز في الماجستير .. ولم يتبق فقط سوى كتابة رسالة الماجستير ..كي أحصل على الشهادة ...
مع ظروف العمل وهذا التحدي ... تغاضيت قليلا عن رسالة الماجستير .. وركزت بشكل أكبر في عملي ...
وفعلا ..انهيت المشروع بنجاح مع صيف 2002م ... وارتفعت اسهمي كثيرا في الشركة بحمد الله
اتى الصيف .. وصيف هذا العام "2002م" كان صيفا مختلفا ... وفاء وصفاء أنهيا المرحلة الثانوية .. وأصبحنا في مرحلة البحث عن افضل اختيار لهما لاكمال الدراسة الجامعية ... وانتهى الامر على ان مصر هي أنسب مكان لهما لاكمال الجامعة ... وبالطبع كان هذا القرار يعني انهما وأمي رحمة الله عليها سيتركان فراغا كبيرا في بيتي ... ... كنت اتمنى ان يكملوا الحياة معي ... وان لا يتعرضوا لعذاب الغربة والفراق ..
لكن في النهاية .. حياتهم الدراسية كانت اهم ... وبالفعل ذهبوا الى مصر مع نهاية شهر سبتمبر 2002م. وكان هذا يعني ايضا انني لن استطيع رؤيتهم الا بعد مرور عامين كاملين ..واصل الى الثلاثين عاما ..وتنتهي مسألة التجنيد بالنسبة لي ..
وبمناسبة ذكر التتجنيد ... فلقد حدث أمر هام ... كان الحل في مشكلة جوازي الذي انتهت صلاحيته في شهر أغسطس 2001م ...
في نفس الصيف ... صيف 2001م ... كان عٌبد باشا موجود في مصر ... كان سنوات دراسته قد قاربت على الانتهاء ... فذهب الى الهيئة الثقافية في مصر المسؤولة عنا نحن الطلبة المغتربون في الخارج ... ورقة تأجيل التجنيد تخرج من عندهم ... طول ماانت بتدرس ..
سألهم عٌبد عن موقفه من التجنيد بعد انهاء البكالرويس ... عرف منهم ان الماجستير اصبح هو ايضا بابا من ابواب تأجيل الخدمة العسكرية الى ان تتم عمر ال 29 ونصف ..
يافرج الله .. معقولة ياجماعة .. بعد ماكنت عايز انزل للخدمة العسكرية اول ماتخرجت علشان كنت باقول لنفسي ..انا هانزل هانزل في الاخر ..واخدم هاخدم .. لان جوازي هتنتهي صلاحيته عام 2001م ..وصعب اني اقدر افضل هربان لمدة 3 سنوات ... وقتها قالي ابويا جملة ..استخدمها حكمة في حياتي من يومها
ماتصليش على الميت .. الا لما يموت ...
وفعلا ..ماصليتش على الميت وقتها ..اقصد لم انزل مصر للتجنيد في بداية حياتي العملية ... وطلع الميت لسة عايش لم وصلت للوقت اللي كنت خايف منه :)
درس جميل أتمنى ان نتعلم منه جميعا ... لاتفقد الأمل أبدا .. وافعل كل ماهو مطلوب منك .. واترك الأمور لربك يصرفها كيف يشاء ..
المهم ... ارسلت ورقي للمسؤول هناك .. واعتمدوا دراستي للماجستير ..وارسلوا لي خطاب تجديد ... وفعلا جددت الجواز الى شهر سبتمبر 2003 ... يعني يكون باقي نص سنة على بلوغي ال 30 .. ودي كانت سهلة جدا والحمد لله
بعد هذه الحادثة الجميلة .. تغيرت الاحوال ..وتغيرت نظرتي للامور من حولي ...وتلاعب امام عيناي رغبة ترك العمل الحالي .. حسيت وقتها اني التحقت بيهم لاني كنت محتاج انقل كفالة .. والوقت كان غاصبني ..
والان اصبحت حرا طليقا ..وممكن ادور براحتي على اللي احسن منهم ..
لم افعل هذه المرة وقررت ان استمر معهم الى ان اكمل ثلاثة اشياء مهمة
1- رسالة الماجستير
2- ورقة الاعفاء من الخدمة العسكرية
3- اتقان عملي معهم .. كان محتاج وقت علشان اتقنه
وبالفعل .. استمر الحال على ماهو عليه ... ذهبت أمي رحمها الله وأختاي الى مصر ... كما اخبرتكم اعلاه في نهاية شهر سبتمبر 2002م ...
وحصلت انا على ترقية ..كي اصبح استشاريا في شركتي مع تاريخ الاول من يناير 2003م
في تلك الاثناء ..حدث أمر جديد ... سيكون سببا في تغيير بعض من حياتي فيما بعد
نراكم في الحلقة القادمة :)
الخميس, 19 يوليو, 2007
منذ ان قررت ان اتوكل على الله ... وادخل غرفة العمليات ... حاولت ان استعجل الامور كي تتم العملية يوم الخميس .. ويسهل علي اخذ فترة من النقاهة قبل سفري الى مصر يوم الاثنين بعد القادم ان شاء الله
نمت كويس .. وصحيت الصبح على الساعة 10 ونص ... طبعا قررت انه مافيش دوام النهاردة ...
اتصلت بالمستشفى ..قالوا ان الطلب ارسل لشركة التأمين ..وهم مستنيين تقرير الطبيب ... قلنا طيب ..ياباسط
بعد ساعة كلموني بيقولوا ان شركة التأمين رفضت ...
ليه طيب .. قلت اكلم التأمين .. قالوا ان الطبيب ارسل بيقول ان سبب المرض اصابة عمل .. وشركة التأمين مالهاش دعوة باصابات العمل ..انما يدخل ضمن نطاق التأمينات الاجتماعية
ياجماعة دي مش اصابة عمل ... مالناش دعوة ..الدكتور بيقول كده ..
كلمت الدكتور وفهمته ... وكلمة دكتور شركتنا وشرحتله ... الكل قال لازم التقرير يتعدل ...وهيعدلوه على الساعة اربعة العصر
قلت كويس ..مافيش مشاكل ...
الساعة خمسة اتصلت .. قالوا ان الرفض مازال مستمرا .. فيه ايه ياشركة التأمين .. قالوا ان احنا قررنا ايقاف التعامل مع الدكتور ده ... ياريت تروح لدكتور تاني ..يكشف عليك ويكتب التقرير هو ...
ياجماعة ده هياخد وقت ... قالوا مالناش دعوة .. الدكتور ده اصبح مصدر غير ثقة ...وخاطبنا المستشفى وسيتم ايقاف التعامل معه
قلت في نفسي سبحان الله ... لسة امبارح كنت باقول لسارة .. انا هاعمل اللي علي ..والباقي على ربنا ..ويبدو ان الخير مش في اني اعملها يوم الخميس ابدا ...
فوضت امري الى الله .. وقررت ان اذهب غدا بنتائج الاشعة الى دكتور اخر .. اوصاني بيه طبيب شركتنا ... ونشوف هيقول ايه
ياعالم ..بكرة مخبي ايه ... الاكيد انه مخبي كل خير ان شاء الله
معكم ..ع. ا. م. ... من اذاعة صعصع
الاربعاء, 18 يوليو, 2007
رحمه الله .. وجزاه عنا خير الجزاء ..
لم أجد رجلا أجمع الناس على حبه مثل هذا الرجل ...
اترككم مع هذه النبذة البسيطة الجميلة عن فضيلته رحمة الله عليه
الاثنين, 16 يوليو, 2007
اليوم .. كان موعدي مع نتيجة الرنين اللي عملته من يومين ... غيرت الدكتور المرة دي .. رحت لاستشاري معروف ... شكله مش غريب عني ... اعتقد اني شفته اكثر من مرة في برنامج تلفيزوني طبي ... جدران المستشفى مليئة بانجازاته في عالم الفقرات ...