وانا ابحث في محرك البحث الجميل ..جوجل ... وصلت الى هذه الصفحة التي اعادت الكثير من الذكريات الى عقلي
بحثت عن ضياء .. ووجدت الاسم مكتوب بالشكل الجميل ده :)
طبعا عُبد .. لقيته برضه
:)
السبت, 23 يونيو, 2007
الخميس, 21 يونيو, 2007
انتهت اولى سنوات الدراسة ... وانطلقت عجلة الحياة ... وبدأت الاجازة ... وفي انتظار الدراسة ... وهذا هو حال الدنيا
ألف مبرووووووووك
رهف ... من الصف الأول الى الصف الثاني ... ونتيجة % 99.98
روان .. من كي جي 1 الى كي جي 2 ... A+
السبت, 09 يونيو, 2007
السبت, 09 يونيو, 2007
حكايتي مع النوم حكاية أزلية .. أبدية .. لا اعلم ان كانت حكاية خاصة ..لايشعر بها الا انا .. أم ان هناك من يشاطرني هذه الحكاية التي اصبحت اتعجب لها
ببساطة
الساعة الان حوالي الثانية فجرا ... ولو حطيت راسي على المخدة ..هانام فورا .... لكن مش عايز ... مش عايز اروح انام ...
مافيش حاجة مهمة باعملها ... كل اللي باعمله دلوقتي كان ممكن اعمله في النهار .. لكن مشكلتي اني ماباعرفش اعمل حاجة في النهار ... اسيب كل حاجة لليل ..واخلص كل حاجة في الليل
ولو مافيش حاجة اعملها ..اخلق اي حاجة علشان اعملها .. حتى لو تفرجت على فيلم بايخ مستحيل في يوم كنت افكر اني اتفرج عليه
والمشكلة اني لو نمت ..بانام 5 ساعات بالكتير ..واصحى لشغلي اللي باقعد فيه حوالي 10 ساعات اليومين دول ... وارجع اتعشى وانام ربع ساعة بس ... وترجع ريما لعادتها اليومية ...
اللي باخليني اروح انام دلوقتي ...حاجة وحدة بس .... اني مع التجربة لقيت اني لو مانمتش خمس ساعات ..مش هاقدر اصحى في معاد الشغل ..
طبعا انا كل يوم باصحى متأخر ربع ساعة مثلا ... لكن في اليوم اللي انام فيه اقل من خمس ساعات . اصحى متأخر حوالي ساعتين تلاتة .. واقرر اخد اليوم اجازة .. الا اذا كان فيه حاجة مهمة جدا في الشغل
ياترى ..ياهل ترى ....
في ايه ؟؟؟؟؟
الجمعة, 08 يونيو, 2007
انت كنت فين وانا مريض ... هي دي اخرتها ... اعمل عملية خطيرة واكون محتاج ليك ومش الاقيك موجود جنبي...
مريض !!! وعملية !!! امتى حصل كل ده ... يابني هو انا مش كلمتك وقتها وقلتلك سمعت انك مريض ..وانت قلتلي لا مافيش حاجة وانا فل الفل وكل اللي سمعته مش صحيح
ايوا انا قلتلك كده ... بس كان لازم تحس اني مريض .. وكان لازم تكون جنبي... هو احنا مش اصحاب
يعجز اللسان عن الكلام بعد ذلك
الاثنين, 04 يونيو, 2007
علشان بس ماتأخرش في ربط الاحداث ... قلت ارجع سريعا بتكملة مشوار العمر ...
أكتوبر 2000م
في ذلك الشهر تلقيت تلك المكالمة التي أخبرتكم عنها بالأمس .... كانت الجامعة تبحث عني منذ خمسة أسابيع ... وأراد الله ان يكون الجوال سببا في وصولهم لي ...
تذكرت بداية مغامرتي مع الماجستير .. وكيف انها لم تكن في الحسبان اصلا ... تذكرت ذلك اليوم الذي ناداني ابي فيه .. وانا متخرج حديثا من الجامعة ..والتحقت بالعمل في اولى وظائفي ... لم اكن قد تزوجت وقتها .. ولم اكن افكر كثيرا في اكمال الدراسة .. المهم اعمل واكتسب خبرات ..واجمع المال ..واتزوج وأكون الاسرة
المهم ..ناداني واخبرني عن انه قرأ اليوم في جريدة الجزيرة عن اخر موعد لقبول التقديم في الماجستير في جامعة الملك سعود .. قلتله وليه بس اتعب نفسي ..اكيد مش هيقبلوني .. عندك واسطة لي ... قالي لا مافيش ..بس انت مش هتخسر حاجة روح شوف المطلوب ايه ... ماسمعتش الكلام ... وطبعا زعل
امي رحمة الله عليها لما شافت زعله .. طلبت مني ان لا اغضبه ..وقالتلي انت هتخسر ايه .. مش هيقبلوك زي منت بتقول ..بس مش لازم تزعل ابوك ...
قلتلها حاضر .. مش هازعلكم انتم الاثنين .. ورحت بدون حتى ورق .. تأدية واجب .. مستني انهم يقولوا مش هنقبلك ... وفوجئت انهم بيطلبوا الاوراق مني .. ايه ياجماعة ..بتهزروا اكيد ..قالوا ابدا . هات الاوراق المطلوبة وقدم الاستمارة ..وربنا يسهل بعد كده. .. الامل تملكني .. واللي ماكانش عايز يجي اصلا ..رجع المشوار للبيت في نفس الوقت ورجع بالاوارق كلها ... وقدم فعلا ... وتم قبول استمارة التقديم ... وقالوا لي سيتم الاتصال بك ..
بعد سنة تقريبا ... وصلتني مكالمة من احد دكاترة قسم الهندسة الصناعية .. بيخبرني فيها ان القسم موافق على ورقي ... بس المشكلة انه مافيش حد تاني تقدم معايا من اللي ممكن يتم قبولهم ... واعتذر مني بأدب ..سألته طيب وبعدين .. قالي لو السنة الجاية تقدم الحد الادني من العدد اللي ممكن نفتح برنامج ماجستير عليه ..هنتصل بيك ..
قلتله ياترى فيه شروط .. اخبرني ان الشرط الاساسي .. كفالتي لازم تكون على الجامعة .. قلتله مش هاقدر .. لاني وقتها ماكنتش اقدر انزل مصر ... واخد تأشيرة من هناك ... علشان الجيش اللي انا هربان منه .. قالي ده شرط اساسي ...ومن غيره لن يتم قبولك ... وانتهى الحوار على انه حتى لو كانت اوراقي كاملة ومؤهلة لي للالتحاق بالقسم .. فالشرط الاساسي مش متوفر في .. نقل الكفالة ... وقلت خلاص .. المهم اني حاولت .. والحمد لله على كل حال ... ورجعت قلت لابويا .. مانا قلتلك من الاول ..ايه يعني كان لازمة التعب :)
وبعد سنة من تلك الاحداث .. وصلتني المكالمة الجميلة التي بدأت بها الموضوع ...
تركت مقر العمل فورا ... وتوجهت الى الجامعة ... وصلت الى رئيس القسم ... سلام عليكم .. وعليكم السلام .. انا فلان الفلاني ، كلموني اليوم وقالوا انه انا تم قبولي عندكم ... ياخي انت فين حرام عليك .. لنا كم اسبوع ندور عليك .. يوم قالوالي مش لاقينه ..طلبت ملفك وشفت رقم الجوال ..واكتشفت انه ماحد حاول يكلمك عليه ... وزين ان جوالك شغال الى الان
قلتله الحمد لله .. كويس انه احد انتبه انو فيه رقم جوال ... شكله مكالمة الجوال كانت غالية ومافي دعم من الجامعة لثمنها :) طبعا بيني وبين نفسي باقول
المهم ... قلتله وايش المطلوب ... قال ولا شي الوقت تأخر ومانقدر نقبلك الان ..تعالى السنة الجاية .. قلتله لا مو معقول .. ياريت تساعدني .. حرام اضيع سنة ... وانا اؤكدلك اني اقدر اعوض الخمس اسابيع اللي راحت
اقتنع ..وارسلني بورقة الى عميد القبول والتسجيل ... وفعلا تم القبول والتسجيل .. اخذت بطاقة الجامعة ..واستلمت الجدول ... كلها مادتين :) ..
لم تكن تلك المشكلة الوحيدة .... فهناك مشكلتان كبيرتان كانتا في انتظاري
المشكلة الاولى وكما اخبرتكم اعلاه ... تشترط الجامعة لمن هم في حالتي ان تكون كفالته على الجامعة ... يعني ايش ..يعني اسيب عملي وانتسب للسلك التدريسي في الجامعة ... طبعا ماكان قدامي الا رئيس القسم ...
يادكتور مااقدر ... انت عارف الفرق بين رواتب العمل واللي الجامعة بتدفعه ..وانا متزوج ومااقدر ... وبصراحة لو كان لازم انقل الكفالة .... ماراح اقدر ادرس ... <=== مستبيع الولد
قالي طيب ..نحلها لك ... ووجهني للشخص المسؤول ... وفعلا كتبت تعهد باتنازل فيه عن مبلغ المنحة الشهري .. حوالي 2500 ريال في الشهر ... وهم تخلوا عن شرطهم الجميل ده ... وخلصت المشكلة دي على خير الحمد لله
المشكلة الثانية .... تشترط الجامعة ايضا ان اقضي عدد معين من الساعات اسبوعيا في العمل داخل القسم .. كمعيد يعني ... طبعا دي كانت من المستحيلات ... دوامي فترتين ... ومش هاقدر اني اتولى دور المعيد في احدى مواد القسم ...
وطبعا انتو عارفين الان انا رحت لمين ... ماكانش فيه غير الدكتور رئيس القسم الله يبارك فيه يارب ويوفقه ويجزيه عني خير الجزاء
لما شافني ..ضحك وقالي ايش تاني ..قلتله ولا شي ..شغلة بسيطة ... ماراح اقدر اداوم عندكم وسط النهار ... وبكل اريحية ... قالي مافي مشاكل ... ممكن نستعين فيك كمصحح لواجبات الطلاب في القسم ...
ووافقت ..واعطوني مهام تصحيح واجبات كل الطلبة تقريبا ... اتفقنا اني اجي مرة في الاسبوع اخذ كل الاوراق ..اصححها وارجعها تاني بعد كم يوم ... وهكذا
في الاول طلب مني اني احضر مرة وحدة في الاسبوع اساعد في مادة الرسم الهندسي .. محاضرة اربع ساعات تقلل علي عدد المواد اللي هاصحح ليها ... لكن مع مرور الوقت لقيتها متعبة اكتر ..ووافق انه يشيلها عني ..ويخليني اصحح لبقية المواد بدل حضور اليوم الممل ده ...
وانتهت المشاكل اللي في الجامعة والحمد لله ... وتبقى لدي مشكلة وحيدة في العمل .. لازم العمل يوافق على اني ادرس حال عملي ...
رجعت لمديري الطيوب .. وشرحتله الحكاية .. وان الدراسة تطلب اني اشتغل فترة واحدة من الدوام لمدة يومين في الاسبوع .. وانا مستعد اني اعوض الفترة الثانية بأني اطلع متأخر من المكتب يومها ... وافق .. ومضى لي على الطلب ... ومضى مدير الشركة كذلك .. ولكن بشرط ان لايؤثر ذلك على العمل ...
رجعت لمديري .. قالي مالكش دعوة توكل على الله ..واوعى تضيع الفرصة دي من ايدك حتى لو سبت الشركة
وانا معاك وهاساعدك ...
والحمد لله .. انتهت كل المشاكل الادارية ... دعم من مديري ... ودعم من رئيس القسم ...وبركة دعاء أمي رحمها الله
أصبحت الان امام مشكلة من النوع الثاني ... مشكلة التوفيق بين العمل .. وحضور المحاضرات ... ومهمة تصحيح اوراق الطلاب ... والاهم من ذلك ... اسرتي الجميلة وعدم اهمالها
ولعلني اجدها فرصة كي أشكر أم فارس ... فلم تشعرني ابدا وقتها انني مقصر في حقها .. بالرغم من اني كنت اقضي اليوم في العمل .. ثم الذهاب الى المحاضرات ..واعود لاتعشى .. وانام ... حتى الخميس والجمعة اقضيهما في المذاكرة ... وتصحيح الاوراق ...
سنة نصف وانا على هذا الحال .. وكل الدعم كنت اجده من أم فارس .. بارك الله فيها ..كانت اكبر داعمة لي معنويا ونفسيا في تلك الفترة العصيبة ... الى ان انتهت فترة المحاضرات ..ودخلت مرحلة التحضير لرسالة الماجستير ... خفت الضغوط علي بشكل كبير
في تلك الفترة ..كانت امي واختاي يسكنون معي في نفس المنزل .. وحاولت المستحيل ان لا تؤثر كل تلك الظروف على أمي الحبيبة رحمها الله ..وطلباتها برغم قلتها .... وكذلك اختاي ... برغم التقصير الواضح ايضا .. لم اشعر بأي تضجر منهم جميعا .. بالعكس كل الدعم والمساندة وجدتها من الجميع .. والحمد لله
وبدأت مرحلة جديدة من حياتي ... مرحلة الدراسة .. والعمل .... ونكمل الحكاية سوية بإذن الله في أقرب فرصة ...
السبت, 02 يونيو, 2007
من زمان ماكتبتش في عالم الذكريات ...
تركتكم وأنا في بداية انتقالي لشركة الانترنت والبرامج المكتبية .... وأنا كذلك أدرس ال CMA .
25 مارس 2000م
بعد أجازة عيد الأضحى مباشرة كان موعدي مع هذه الشركة ... في قسم التسويق ... ايه مش عارف ... وبيعملوا ايه مش عارف برضه . المهم مديري راجل طيوب ..سعودي مش معاه شهادة جامعية ... بس خبرته العملية كبيرة ..وكان بياع شاطر جدا
احلى مافي الشركة .. انها كانت الشركة صاحبة اول منتدى كتبت فيه ... وكان النت لاول مرة اشوفه قدامي اربعة وعشرين ساعة ..
علشان كده ماهتمش كتير بالشغل اللي باعمله ..كنت مهتم اكتر بالدراسة ... والمنتدى :) ...
بعد شهر من التحاقي بالعمل .. لقيت ان دراسة ال CMA مش نافعة ... لاني اكتشفت انهم بيحفظونا الاسئلة والاجوبة .. ولا انا عارف هم بيتكلموا عن ايه اصلا .. طبعا ماكانش غرضي الشهادة ..كنت مهتم اكتر اني افهم .. ولما لقيت انه ده مش متوفر عندهم ..تركتهم ...
في نفس الوقت ..جاءني عرضان مختلفان من شركتين اخريين .... براتب اعلى قليلا ... ومزايا افضل نوعا ما
لكني رفضت ... وفضلت اني افضل في الشركة دي ... رغم اني لسة ماكنتش انهيت اجراء النقل ليهم ..
مع مرور الوقت ... بدأت التأقلم على الاجواء والمهام ..التي لم تكن معقدة او صعبة ..لكنها مملة ...
في شهر يوليو .. يعني بعد ثلاثة أشهر ... شرفتنا رهف بحضورها الكريم ... وجاءت لتملأ الدنيا سعادة وبهجة ... ولها موضوع مستقل ان شاء الله ...
في نهاية شهر سبتمبر .. فوجئت باتصال هاتفي من عمادة القبول في جامعة الملك سعود ... خير ياجماعة ..قالوا انت انقبلت في الجامعة لدراسة الماجستير في الهندسة الصناعية ... معقولة ياجماعة ..انتو بتتكلموا جد والا بتضحكوا ..
قالوا اكيد جد .. لنا شهر بنحاول نكلمك ..وارقامك كلها مش شغالة .. واخيرا لقينا الجوال وقدرنا نجيبك ..ياريت تمر على رئيس القسم في الجامعة
طبعا انا من يومها حبيت الجوال موت ... ويكفيني منه هذه الحادثة .. يعني لو ماكانش فيه غير الفايدة دي يبقى كفاية ..لانه فعلا رقم البيت كان تغير ..والوظيفة وغيرتها وطبعا تليفونها اللي كان مكتوب مش نافع ..
والحمد لله انه كان معايا موبايل وقتها ... وماكنتش غيرته ...
علشان كده قررت اني ماغيرش موبايلي طول ماانا في المملكة ان شاء الله ... والرقم معايا زي ماهو من سنة 1998 الى الان ... بس حولته الى ال خمسة بدل الصفر مع التغيير اللي حصل .. وبرضه اللي عايزني هيقدر يوصلني بسهولة
رحت على طول لرئيس القسم ... وبدأت مرحلة جديدة في حياتي ...
نكملها مع بعض ان شاء الله فيما بعد
الجمعة, 01 يونيو, 2007
كل شهر وأنتم بخير .. وهاهو شهر من العمر يمضي ... نسأل الله لنا ولكم أن يبارك في أيامنا وأعمارنا شهر مايو .. شهر السفر والتغيير ... شهر يحمل ذكرى جميلة .. ذكرى بداية حياة جديدة ... شهر بداية ارتفاع درجات الحرارة .... والاستعداد للامتحانات.. العائلة رحمك الله ياأمي .. وأسكنكِ فسيح جناته العمل رحلة عمل طويلة نوعا ما .. لمدة عشرة أيام .. خمسة أيام في فرنسا ..ومثلهم في سويسرا ... رحلة ممتعة ... وتغيير كنت احتاج له ... وبلاد أنعم الله عليها بالكثير من الجمال وراحة البال
اول مرة أمر في حياتي العملية بتجربة استقالة موظف يعمل تحت ادارتي ... حاولت معه .. لكنه مصمم على الاستقالة ... وأصر على ان يكون اول حالة استقالة في حياتي المهنية متفرقات كتاب جديد آخر بدأت في قراءته .. ولم انهيه حتى الان ... حياة في الادارة ... للدكتور غازي القصيبي المدونة عدد المقالات : 100 مقال عدد التعليقات : 846 تعليق عدد الزيارات : 8192 زيارة
ثمانية سنوات تمر على حياتي الزوجية ... حياة بحثت عنها كثيرا اثناء الدراسة ... وتحولت الى حقيقة .. بكل مافيها من مميزات وعيوب ... كل عام وزواجنا بألف خير ياأم فارس
مازال سفري الى مصر في الاجازة مش مؤكد ... غالبا الاسرة هتنزل لوحدها وانا هاخطف اسبوعين معاهم في النص ان شاء الله ... لكن مازال حجزنا المؤكد جميعا كما اخبرتكم به في الشهر الماضي
رهف وروان .. والاستعداد لاول امتحانات نهاية عام دراسي .. بالتوفيق يارب .. ونفرح مع بعض في شهر يونيو بنجاحهم ان شاء الله
عودة لالام الظهر ... والعلاج الطبيعي مش مستمر عليه بالشكل المطلوب ... وربنا يستر
وجاء اليوم الذي ثبت فيه لهم اني كنت انا الرقم الصعب ... وتمر الايام عليهم دون حياة ... وجملة اتركها للذات .. دون شرح أو توضيح :)
جيران فاجأتني الشهر الماضي بموضوع جميل يتناول فيه اخبار المدونين بشكل عام .. وأسعدني ان تكون أخباري جزء من ذلك الموضوع ... شكرا لجيران
مائة مقال في هذه المدونة الجميلة ... ثمانية أشهر مرت منذ انشاء هذه المدونة ... مازلت بعيدا عن الرقم الذي وضعته لنفسي بداية العام 2007 ... متأخر ب 40 مقالة حتى الان :)
حتى لحظة كتابتي هذا الموضوع
<<الصفحة الرئيسية
