صعصع - مدونات جيران

الاثنين, 28 مايو, 2007

كنت استخدم التوقيع اعلاه ذات يوم في منتديات موانئ

وتطوع أحد أعضاء المنتدى بتحليل شخصيتي من خلال هذه اللوحة الجميلة

وكان هذا تحليله لي ..

هذه شخصية واضحة كالشمس لا تحتاج الي كثير من الكلام
ملخصها
××الخوف من الزمن××
الزمن بالنسبة لابو رهف هو ذلك الكابوس اللابد وراء الباب
لا يعلم في اي لحظة سيباغته بوجهه الغامض ليبدد هناءته وسعادته
بالطبع لن اتحدث عن الجانب الابوي في الموضوع باعتباره يقطر من كل حرف في توقيع ابو رهف ((كاظافر يديك))
ناتي هنا لكلمة محورية في التوقيع
الغريييييييييييييييييييييييييييب
شعور عارم وغير مبرر بالعدمية والعبثية
يعتقد ابو رهف والله اعلم انه لن يخلف وراءه سوي خطوات فوق رمال ناعمة لن يبقي منها اثر بعد قليل فقط
بالتاكيد انا لست منجما
وقد يكون تحليلي مجانبا للصواب
لكن ان كان هناك شئ اثق تماما بصحته
فهو ان ابو رهف كتب او اختار هذا التوقيع في لحظة قلق نفسي ربما اكتئاب او ما شابهه

تحية حب للساحر .. الديك الخلوق ..كما احب أن يطلق على نفسه

مارأيكم انتم ؟

(7) تعليقات

وعدنا سالمين الى ارض الخبر

السبت, 26 مايو, 2007

كيفكم ياحلوين ... المفروض اني كتبت البوست ده من اسبوع .. لكن نعمل ايه .. الكسل

من اسبوع ..لأني رجعت الى الخبر يوم الخميس 17 مايو ...

اخر حاجة سبتكم فيها كان المفروض اني مهاجر تاني يوم لباريس .. عاصمة النور ...

وكنت ناوي اكتب هنا عن تفاصيل الرحلة يوم بيوم

لكن ... وتحتها مية خط ... بكل اسف .. يبدو انو فيه ناس كانت متتغاظة من سفرتي دي ... لان ظهري والفقرات اشتغلوا بشكل كبير جدا ... لدرجة اني ماكنتش قادر اتحرك ... فقضيت الفترة اللي فاتت تقريبا في الفندق ..للراحة

نزلت باريس فعلا يوم الجمعة ... ونزلت يومها تمشيت في الشانزلزيه ... لغاية مانكسر ظهري ..ورجعت لغرفتي ....

شفت المسلة المصرية .. متحف اللوفر ... قوس النصر العظيم :) ... ورجعت متكسر للفندق

تاني يوم اصريت اني اروح لبرج ايفل ... وركبت المركب في رحلة جميلة .... ورجعت بدري بدري للغرفة ريحت فيها لتاني يوم ...

اخدت القطار ... ومباشرة في اتجاه جنيف ... وصلت العصر ... نزلت البحيرة على طول .. شيء جميل جدا .. الناس كلها على البحيرة ...

اخدت كرسي ..وجلست استمتع بالجو الجميل ... وفي نهاية اليوم ركبت مركب في رحلة برضه لمدة ساعة ...

وطبعا في راحة الى ثاني يوم ... واصبح الامر كله عمل في عمل .. الى المكتب ..وعودة الى الفندق ..

الى يوم الاربعاء عصرا ..ذهبت الى القطار ..رجعت الى باريس ... والخميس الظهر ركبت الطيارة عائدا الى البحرين ... ومنها الى الخبر

والحمد لله على كل حال .. نعوضها المرة الجاية

موقفين حصلوا معايا في الرحلة دي .. حابب اكتب عنهم للذكرى :)

=========================

وانا ماشي في الشانزلزيه ... في ساعة عصاري ... وباتفرج على المحلات والناس ... والمطر نازل يرخ على دماغي ومش معايا مظلة ... انتبهت لوش مش غريب علي ... مين .. معقولة ... كان واحد وجنبه وحدة محجبة ... انا ركزت عليه طبعا علشان اتأكد من الوش ... انتبه لي ... ركز هو كمان في وشي ... ضحك وانا ضحكت

قلتله يعني مانشوفش بعض الفترة دي كلها ... ونتقابل في الشارع العظيم ده ...

كان احد زملائنا في سكن المستشفى العسكري .... علي البلوي ... اخدت اخباره .. وعرفت انه بيحضر الدكتوراة في الطب ..في فرنسا .. وده اول يوم له في فرنسا ... واللي معاه كانت زوجته .. اللي طبعا اختفت اول مااتهبت انه في حد من السعودية يعرف زوجها موجود :) <=== عمرهم ماهيتغيروا :D

بالتوفيق ياعلي ...

===========================

في جنيف .. اول يوم رحت اتعشى في مطعم موفنبيك ... اكلت وجبة السمك المفضلة ... وطلبت الايسكريم البلاك فورست الجميل ...

انتبهت كده ان قطع الشوكولاته عليها نقط كأنها نقطة ماء .. طلبت الهانم وسألتها ايه ده .. قالتلي ده زي الشربات بيتنقط على الشوكولاته ... قلتلها تأكدي الله يخليكي ..راحت ورجعت ..وقالت متأكدة .. قلت طيب ..

توكلنا على الله ... وأكلنا ... الطعم فعلا غريب ... والريحة اغرب ... انا قلت اكيد الايسكريم ده معفن ... رحت ناديت على الهانم .. وقلتلها انتي متأكدة انه الايسكريم ده خالي من اي مواد كحولية ... راحت .. ورجعت مديرة المطعم بتشيل الطبق ...

فيه ايه .. قالت احنا اسفين ..بالغلط اضفنا نكهة من الكحول لطبقك .. ياولاد اللذين ..هي العفانة دي كانت كحول

طبعا هم قالوا ده ارهابي ..وهيفجر المطعم :) ... طبعا انا عصبت شوية .. لاني كنت حاسس وطلبت ان الهانم تتأكد ..ورجعت بكل ثقة تقول متأكدة ...

عموما ..قلتلها حصل خير ... هاتي غيره ..هاكله يعني هاكله ...

راحت المديرة ..ورجعت الهانم بالطبق ..وهي يعني شوية وتعيط ... ومعلش انا اسفة .. ماكنتش عارفة ... اصلي انا يهودية وعارفة ايه معنى ان الحاجة تكون محرمة ..

يخرب بيت شيطانك .. يهودية كمان .. يعني جاية تفرحيني بجمال خطوتك والا ايه

قلتلها ياستي حصل خير .. مافيش مشاكل .. واكلت طبقي بالهنا والعافية ...

ودفعت الفاتورة من غير مايحسبوا الايسكريم علي ...

كنت فاكرهم المعفشنين مش هيحسبوا حاجة خالص :p

وتوتة توتة خلصت الحدوتة

نراكم في رحلات اخرى ان شاء الله

(4) تعليقات

ثمانية سنوات حب وعطاء

الاحد, 13 مايو, 2007

زوجتي الحبيبة .. أم فارس

كل سنة وانتِ بألف خير ... كل سنة وأنتِ بجانبي ..تنيرين حياتي .. وتسعدين لحظاتي

تمر الساعات والأيام بقربك كأنها لحظات ... السعادة عنوانها ... والتفاني والاخلاص لباسها

برغم الابتعاد وآلام الغربة ... وبرغم طبيعة السعودية وماتفرضه من قيود على أمور كثير في حياة المرأة .... لكنكِ لم تشتكي مطلقا ... ولم تشعريني بأي شيء مما قد يجول بداخلك من أحاسيس ومشاعر

بالعكس .. لا أرى الا كل رضى ... وكل محبة ... وحنان

شكرا لكِ زوجتي الحبيبة ... واسأل الله أن يجزيكِ عني وعن أولادنا خير الجزاء

رهف ... روان .. فارس .. ماأصعبها من مهمة أيتها الحبيبة ... مهمة أعلم تماما أنكِ تقومين بكل ماهو ممكن من أجل اتمامها على أكمل وجه ... دون أن تشعرين أحد بمدى صعوبتها .. ومايرافقها من لحظات ضعف ... وارهاق

عامنا الثامن نحتفل به وأنا في مدينة وأنتِ في مدينة أخرى ..و المسافة بيننا 8 ساعات بالطائرة ..

لكن ..هذه التكنولوجيا الجميلة جعلتنا نحتفل به وكأننا سوية ... فكل عام ياحبيبتي وانتِ الحب

(21) تعليقات

ووصلنا Blois ومضى يومان .. وغدا نهاجر

الخميس, 10 مايو, 2007

ها ياجماعة .. معايا والا ضعتوا زيي

ركبت القطار فعلا في الموعد ... حبيت اريح راسي شوية ..ضبطت ساعة الجوال على الموعد اللي مكتوب عندي للوصول ... ونمت شوية

صحيت على الموعد .. واستنيت اسمع المذيعة الداخلية بتقول اسم المدينة .. لقيتها رطنت من غير ماتقول الاسم ..قلت يادي النيلة ..في ايه .. كلمت اللي جنبي ..طلع مايعرفش عنجليزي ... بس فهمني وفهمت منه اني لازم انزل واخد قطار تاني ..

لاحول ولا قوة الا بالله ..ليه كده بس ... نزلت .. وفعلا كلامه صح ..بس القطار التاني على الساعة 5 ..والساعة الان 3 ونص ... والمحطة صغنطوطة ...

اتكلت على الله ..وشفتلي حاجة كلتها ... لغاية القطار التاني ماوصل ... وخلال نص ساعة كنت في Blois

المفروض اني لو عارف طريقي اكون فيها من الساعة 11 ظهرا ... لكن معلش .. مافيش حاجة بالساهل

طلعت من المحطة ... خمس دقايق لغاية ماوصل تاكسي .... ووصلت الفندق آمنا .. Mercure

كلمت زميلي اللي في المصنع هنا .. واتفقنا يعدي علي بعد نص ساعة ..وفعلا وصل ورحنا البيت عنده تناقشنا شوية في الشغل .. لغاية ماكلمونا مجموعة تانية وصلت ..فرحت انا وهو للمطعم اللي اتفقنا عليه ..واتعشينا عشوة حلوة ...

رجعنا الفندق ... ونمت زي القتيل ...

تاني يوم ..صحيت على 8 ..فطرت ..رحت المصنع ..اجتماعات .. لغاية الساعة 6 ... رجعت الفندق ..على طول على المطعم اللي تعشينا فيه المجموعة كلها ..حوالي 30 واحد ...

رجعت ..نمت .. صحيت متأخر ..8 ونص ..مافطرتش ..طلعت المصنع على طول .. اجتماعات . حجزت الفندق في باريس ... وبكرة ان شاء الله احجز للقطار ...

رجعت الفندق ... لفيت البلد شوية ...خدت شوية صور ... لقيت مطعم عربي .. تعشيت فيه .... رجعت الفندق ..سبحت نص ساعة .. اشتريت بطاقة نت ..واديني معاكم اهه :)

سريع سريع .. صح

نراكم غدا ان شاء الله على خير

(4) تعليقات

اليوم الأول ... مطار باريس

الثلاثاء, 08 مايو, 2007

ماأجمل العلم القرنسي اللي مزين ردودي في جيران :)

انا الان في مطار باريس ... انتظر القطار اللي هيوديني ان شاء الله الى Blois .. المدينة اللي المفروض اقضي فيها الاربعة الايام القادمة ان شاء الله

تركتكم بالأمس وانا متوجها الى مطار البحرين ... ووصلت بالفعل حوالي الساعة 12 مساء

انهيت اجراءات الصعود الى الطائرة .. وبكل اسف كنت من اخر الركاب ..فمالقيتش مكان الا في النص ..ربنا يعين اللي جنبي

دخلت صالة المطار .. وانتظرت الرحلة ... الساعة 1:45 موعد اقلاعها

اكلت في المطار وجبة ناجتس خفيفة ... وتمشيت شوية .. الى ان جاء وقت الصعود الى الطائرة .. الساعة 1:15 تقريبا

كعادتي .. طلعت اخر واحد .. ولقيت كالعادة واحد مستولي على الكرسي بتاعي ... فقلتله من فضلك الكرسي ... استعبط .. قال الكرسي ده بتاعي .. اللي جنبي هو اللي بتاعك

بيني وبينكم .. كان فيه بنوتة جنب الكرسي بتاعي .. وهو داخل جو معاها ... فقلت والله لاخرب عليكم :p

قلتله لو سمحت ..الكرسي بتاعي ... طبعا كان هيغتالني .. وساب الكرسي ..وانا قعدت وكنت حاسس ان الاتنين هيغتالوني ...

المهم .. الرحلة كانت جميلة ... مش علشان البنوتة اللي جنبي ..علشان ماحسيتش بال 7 ساعات خالص ... كلها كانت نووووووووووووم .

عوضت سفر اليومين اللي فاتوا ... وتعبهم

ولاول مرة اركب طيارة ماكلش فيها حاجة ...

صحيت على الهبوط ... .. نزلت الظيارة .. وبكل اسف ..برغم النداءات والرجاءات .. كل الناس لازم توقف اول ماتنزل الطيارة وتستقر امام البوابة

مش عارف ليه ..نفسي افهم ... بيفضلوا واقفين لغاية كل اللي قدامهم مايمشوا ..وقفوا والا قعدوا ..هيمشوا لما يجي الدور عليهم ...

كنت فاكر احنا بس اللي بنعمل كده ..لكن اكتشفت انه مرض عالمي :)

المهم نزلت من الطيارة ..الساعة 8 بتوقيت باريس

مش عارف حاجة في اي حاجة .. سألت ودلوني على محطة القطار بالعافية

الرحلة الى Blois الساعة 1:45 ظهرا .. والساعة كانت 9 ونص ..

قلت مش مشكلة ..ياترى استنى في المطار والا اطلع اشوف باريس

بصراحة شنطي اللي معايا خلتني افضل الانتظار في المطار ..وكمان علشان النت اللي لقيته بلوشي ده .. طلعت اللاب توب ..وهاتك يانشاط :)

رغم اني عارف لو دورت هلاقي حاجة زي خزنة كده احط فيها شنطي واطلع اتمشى شوية في باريس

لكن مافيش مشاكل ..الجمعة والسبت في باريس ان شاء الله

وهاانا اكتب لكم من محطة القطار ... وباقي ساعتين تقريبا

صعصع الطويل ... محطة القطار ... باغي

(6) تعليقات

بداية الرحلة ... استودعكم الله

الاثنين, 07 مايو, 2007

خلال 30 دقيقة بإذن الله ..سأتوجه الى مطار البحرين ... كي استقل طائرة ال Gulf Air

متوجها الى باريس ... في بداية لرحلة تستمر ان شاء الله لمدة 10 ايام ... الى فرنسا ..ومن ثم سويسرا

ان شاء الله هاحاول اكتب عن الرحلة وانا هناك ..

بس قولوا يارب :)

اتمنى انكم تسامحوني جميعا .. انا عارف اني باغلط في ناس كتير ..اصلي مدب :)

نراكم على خير

(3) تعليقات

إبريل 2007

الثلاثاء, 01 مايو, 2007

كل شهر وأنتم بخير .. وهاهو شهر من العمر يمضي ... نسأل الله لنا ولكم أن يبارك في أيامنا وأعمارنا

شهر إبريل .. شهر استمرار الكسل في عالم التدوين ... لكنه شهر التحرك العائلي في اتجاه التدوين ...

العائلة

رحمك الله ياأمي .. وأسكنكِ فسيح جناته

أمل بهاء ... كل سنة وانتِ بألف خير يارب ... كبرتي وكبرتينا معاكي .. ربنا يوفقك في الشهادة .. وتكوني موفقة ان شاء الله في الامتحانات النهائية

فارس باشا ... وأول فرد في عائلتي الصغنطوطة تطلع ليه اقامة لوحده ..اقامة من النوع الجديد ... عقبال ماتتلغي الاقامات كلها ..ويتلغي نظام الاستعباد ده

كنت فاكر اني لسة عايش في ايام العسل .. حبيت احجز للعائلة لنزول الاجازة في مصر .. بدأت ابحث عن حجز من تاريخ 20 يونيو ... للاسف ..اول حجز انتظار كان بتاريخ 9 يوليو .. واول حجز متأكد كان بتاريخ 15 يوليو ... والعودة اول حجز متأكد بتاريخ 14 سبتمبر .. دنيا عجيبة بتلف وتدور

العمل

ابتداء مهمتي الرسمية الثانية في الشركة بتاريخ 8 إبريل ... ربنا يسهلها ونحتفل مع بعض بانتقالي للمهمة الثالثة ان شاء الله

دورة جديدة في العمل ..هذه المرة في منتجع Novotel في البحرين .. استمرت لمدة يومان وكانت بعنوان Integrated Supply Chain

كنت ياقول ان رحلة العمل متوقعة ل 3 دول ... انتهى الشهر بخروج دولة منها ... والمفروض ان شاء الله اني طالع فرنسا يوم 7 مايو ... و منها على سويسرا يوم 13 مايو والعودة للدمام يوم 17 مايو

متفرقات

الأهلي السعودي ... وبطولة جديدة يضيفها الى خزائنه هذا العام ..كأس ولي العهد ..ألف مبرووك

كتاب جديد قرأته هذا الشهر .. 4 فئات دم ... 4 انظمة غذائية

شريط سومة .. شريط جميل جدا ..انصح بسماع اغانيها ... وخصوصا اغنية ضحكت لي سنيني

المدونة

شهر الكسل الاكبر .. مش عارف ايه اللي بيحصل

حتى لحظة كتابتي هذا الموضوع

عدد المقالات : 93 مقال

عدد التعليقات : 772 تعليق

عدد الزيارات : 6751 زيارة