التعاونية للتأمين ..وسرقة عيني وعينك

صباح الورد جميعا ... والا مساء الفل :)

امبارح تعرضت لعملية نصب جميلة وحلوة .. مع الف سلام وتحية لوزارة التجارة الموقرة

الحكاية اني حبيت أأمن على سيارتي عند التعاونية .تأمين شامل

بحثت الى ان وصلت الى رقم فرع الخبر ... وكلمتهم ووصلت لمندوب لديهم ... اخذ معلوماتي

واتفقنا على كل التفاصيل .. بان تكون نسبة تحملي في كل حادث 500 ريال

ووصلنا للمبلغ المطلوب اني ادفعه ... واخذ الماستر كارد وخصم المبلغ على أساس ان الاوراق يجيبها لي تاني يوم على المكتب

تفاجأت ان المبلغ المخصوم أقل ب 100 ريال من اللي اتفقنا عليه ... قلت بارك الله فيه

لما شفته .. قالي ايوة انا لما لقيت فيه فرصة اني اخصم ..خصمت ... قلت كويس

فتحت الورق ..لقيت نسبة تحملي 750 مش 500 زي ماتفقنا ...

ايه الحكاية ياعم... قال هي 500 ..بس احنا بنكتبها 750 علشان ده تصليح وكالة

ياعم قول حاجة غير كده ..

وانا هاكدب عليك يعني ..

قلتله طيب ياسيدي ..متشكرين ... وتاني يوم اتصلت بالخط المجاني .. سألت في الاول عن الاسعار ..

لقيت فعلا السعر اللي اخدته منه كان سعر ال 750 مش ال 500 اللي متفقين عليها . سألت عن حكاية الوكالة اللي ألفها لي ..قالوا لي مافيش حاجة اسمها كده

طب ياجماعة ..وبعدين..ولا قبلين ... عايز تخليها 500 هتدفع 400 ريال زيادة .. ياجماعة ده كانت 100 ريال بس ..لا معلش هي دي الاسعار بتاعتنا عاجبك والا خليها زي ماهي ..

لا مش عاجبني ومش هاخليها ..وعايز فلوسي ومش عايز التأمين بتاعكم ..

مافيش مشاكل .. خد فلوسك ..بس هنخصم نسبة وقدرها 15% "450 ريال" علشان انت بتلغي العقد اللي بينا وبينكم

وشر البلية ..مايضحك