السبت, 28 اكتوبر, 2006
انتهيت معاكم المرة اللي فاتت على نهاية السنة الاولى الجامعية .. يعني يونيو 1994م
بعد أن انتهت السنة على الف خير ... وجاء الصيف .. صيف 94م ... وطبعا قلت للوالد مافيش صيفي ..انا نازل مصر
وفعلا ..نزلت مصر .. وانبسطت جدا .. كانت من اجمل اجازاتي في القاهرة .. كفاية انه كان معايا شوية قرينقيشات :) طالب طبعا وبياخد مكفاءة شهرية ..مين قده
سافرت بالباص وقتها ..علشان اوفر في المصاريف .. واصرفها هناك في مصر ...
وانتهت الاجازة الجميلة ... وعدنا الى ديار الجامعة
وبداية السنة الثانية ...
السنة التي يحدد فيها كل طالب التخصص الذي سيسلكه في دراسته الجامعية .. وكان اختياري واقع على هندسة النظم كما اخبرتكم سابقا ...
انا كنت مسجل تسجيل مبكر مواد من هندسة النظم ... ورحت استلم الجدول مع بداية كل فصل كالعادة
طبعا كان استلام الجداول عذاب ..طوابير طويلة عريضة .. وتستلم جدولك ..تشوف ايه اللي تم تسجيله فعلا زي مانت كنت عايز من التسجيل المبكر ..وايه اللي انقفلت الشعبة عليك ومالحقتهاش ..وترجع طابور تاني طويل عريض علشان تعدل وتغير ...
استلمت الجدول في النهاية ... وفاجأني انها كانت لاتحتوي على اي مادة من المواد اللي سجلتها سايقا ..
كل مافيها مواد من تخصص علوم الحاسب الالي ... فيه ايه ياجماعة ..انت اجنبي ولا يحق لك دخول اي كلية من كليات الهندسة .. يادي النيلة مانتو قلتوا ان هندسة النظم مفتوحة لينا
ولا حياة لمن تنادي ..كان امامي طريقين ..اكمل وامري لله في علوم الحاسب الالي
او اني اسلك طريق الطلبات لادارة الجامعة ..كي يتم الموافقة على التحاقي بهندسة النظم
قررت طبعا اني اخوض الطريق الثاني ..بس كان لازم في المقابل اني احذف كل موادي اللي تم تسجيلها لي .. وتسجيل مواد ممكن تكون مناسبة للتخصصين
وفعلا ..لقيتها فرصة اني اعيد الفيزياء .. واخدت كم مادة عامة معاها .. من اللي تبقوا من السنة الاولى .. وتوكلت على الله
انهيت الفصل الاول على خير والحمد لله ..وفي نفس الوقت كان طلبي تم الموافقة عليه .. وبدأت مرحلة التخصص منذ الفصل الثاني ...
تعلمت من هذه التجربة انه لا يأس مع المحاولة .. حاول وشوف ..وامسك العصاية من النص ..اذا كان ممكن طبعا
ونتوقف عند شهر يونيو 1995 م
الجمعة, 27 اكتوبر, 2006
بدأت الرحلة عند الساعة الثالثة فجر يوم الخميس 19 أكتوبر .. الموافق 27 رمضان
شغلنا السيارة ..وتوكلنا على الله ... الطريق حوالي 900 كلم ..مناصفة بين أراضي السعودية والامارات
عند السابعة والنصف صباحا كنا قد وصلنا الحدود وانهينا اجراءات الخروج والدخول ... وانتقلنا من حال الى حال
سبحان الله .. فرق شاسع بين الطريق من الخبر الى الحدود ..وبين الطريق من الحدود لدبي
يكفي ان الاستراحات داخل الامارات تغنيك عن كل شيء .. جمال ونظافة .. وفيها كل حاجة
لكن في السعودية .. الله يعين بس ..
وصلنا دبي .. الى بيت أخي .. عند الواحدة والنصف بتوقيت الامارات ... ابويا كان لسة هناك ..كان فاضل ليه ساعة ويطلع المطار عائدا الى الرياض .. كويس ان احنا لحقناه وشفناه
=======================
أيام ماقبل العيد لم يكن فيها الكثير من النشاطات .سوى المولات والبحث عن الجديد :)
=======================
أول ايام العيد .. كان ابن بطوطة له نصيب البداية فيه ... وفيلم عمارة يعقوبيان .. اللي شفتها مرتين قبل كده .. لكن الموت مع الجماعة رحمة :)
وبعدين غدوة حلوة في مطعم جميل ..نسيت اسمه .. وسهرة عائلية حلوة بعد كده في الليل
======================
ثاني ايام العيد انتقلنا الى كورينش الفجيرة .. ممتعة الجلسة كانت .. وشفنا الصيادين وهم بيطلعوا السمك اللي اصطادوه .. ولعبنا في الرمل والماء .. وشوية طاولة وكوتشينة ..
مع المشاوي .. كان يوم لذيذ فعلا
=======================
ثالث يوم العيد كان مخصوص لأولاد اخي .. فسحة مخصوصة لكل واحد منهم ..فسحة لعمرو ..شفنا فيها فيلم .. وفسحة لسميرة ..وفيلم كمان
=========================
ثم كانت رحلة العودة .. والتي بدأت عند الساعة الحادية عشر ظهرا ..يوم الخميس ... ووصلنا البيت الساعة السابعة مساء بتوقيت المملكة
رحلة جميلة فعلا ..وكل عام والجميع بخير
الخميس, 26 اكتوبر, 2006
حمد لله على سلامتي
اليوم رجعنا الى قواعدنا في الخبر سالمين بحمد الله
عند الساعة السابعة مساء
بعد رحلة استغرقت تسع ساعات بالتمام والكمال
الاحد, 22 اكتوبر, 2006
كل عام وأنتم بخير
عيد سعيد يارب على الجميع
هذه المرة .. من أرض دبي .. دانة الخليج
الاربعاء, 18 اكتوبر, 2006
الثلاثاء ... 25 رمضان 1427 هـ ... 17 أكتوبر 2006
أول يوم يابنتي ياحبيبتي تصوميه في حياتك
ياترى بكرة لما تكبري هتفتكري شعورك كان ايه ..
انا عن نفسي فرحت جدا لما عرفت ... رجعت من الشغل على الافطار .. وتفاجأت انك بتقوليلي انا صايمة النهاردة يابابا
ربنا يبارك فيكِ
=======================
إضافة بعد نهاية شهر رمضان
عدد الأيام اللي صمتيهم يارهف .. خمسة ..ماشاء الله تبارك الله
الاثنين, 16 اكتوبر, 2006
ماشاء الله تبارك الله
قلتها كويس ..قولها تاني
بسم الله ماشاء الله
:)
النهاردة كان يوم الافطار الجماعي للشركة ..في قاعة الاندلس في الدمام ..
هذه الامور الرائعة كنت أفتقدها في الشركات السابقة ..لكن المحترفين فعلا محترفون
بعد الافطار .. والصلاة .. والحلا ... كانت اخر فقرة في هذا الاجتماع
سحب على 35 جائزة ... عدد الاشخاص حوالي ال 350 ..يعني نسبة ان اسمي يطلع ..كان 10% بس
راحت الجوائز وحدة ورى التانية .. مديري كان جنبي ..ومن كتر مابالعب بلاي ستيشن في الشغل . كان شغال طول الوقت ..انت هتكسب البلاي ستيشن اكيد ..
وانا اقوله ياسيدي انا عمري ماكسبت .. مستحيل أكسب ..
33 جائزة راحت ... ومابقاش الا اثنين ..
وتفاجأت ان اسمي كان رقم 34 .. ياسلام ياولاد ..انا كسبت
خدت حاجة حلوة .مش البلاي ستيشن ..اصل اللي مايعرفوش مديري ..انو انا عندي واحد فعلا :)
مش هاقول كسبت ايه :)
قولوا يالا مبرووووووووووووووووووك
وقولوا ماشاء الله تبارك الله
اهم حاجة
كان يوم جدا جميل
السبت, 14 اكتوبر, 2006
اقتربت اجازة العيد .. وأكيد كل واحد في دماغه هيقضي العيد فين
ياترى ..فين هتكون في العيد
عن نفسي ..المفروض اني اكون في دبي .. اخد اسبوع راحة هناك
وانت ؟
كل سنة وانتم بألف خير يارب
عيد سعيد مقدما
الجمعة, 13 اكتوبر, 2006
وصلتني رسالة من عزيز .. تحتوي على مجموعة من الأذكار
بدأت في قراءتها ... ووجدت فيها بعض الأمور العجيبة .. فقررت البحث عن مدى صحتها .. وللأسف ..كما توقعت ..الكثير منها ضعيف أو لم يرد أصلا عن الرسول صلوات الله وسلامه عليه
المهم ..في خلال جولتي .. وجدت موضوعا رائعا ..يجمع الكثير مما نعتقد أنه صحيح ..ونردده ليل نهار ..
أحضرت الرابط لكم ... وأحضرت لكم بعضا مما كان معلوما عندي أنه صحيح ..وتبين أنه غير ذلك
أما هذه ..فجملة مما كنت أعتقد أنه صحيح مما ورد عن رسولنا الحبيب ..صلوات الله وسلامه عليه
================
جاء رجل إلى النبي صلى الله عليه وسلم فقال: إن ها هنا غلاماً قد احتضر، يقال له: قل لا إله إلا الله، فلا يستطيع أن يقولها، قال: أليس قد كان يقولها في حياته؟ ... الى تتمة الكلام.
=================
بينما النبي صلى الله عليه وسلم في الطواف ، إذ سمع أعرابياً يقول : يا كريم فقال النبي (صلى الله عليه وسلم) خلفه : يا كريم فمضى الأعرابي إلى جهة الميزاب وقال : يا كريم فقال النبي (صلى الله عليه وسلم) خلفه : يا كريم .....
إلى أن قال .......
وعزته وجلاله، إن حاسبني لأحاسبنه فقال النبي صلى الله عليه وسلم : وعلى ماذا تحاسب ربك يا أخا العرب؟ قال الأعرابي: إن حاسبني ربي على ذنبي حاسبته على مغفرته ، وإن حاسبني على معصيتي ، حاسبته على عفوه، وإن حاسبني على بخلي حاسبته على كرمه
======================
المؤمن كيس فطن حذر
=========================
جاء رجل إلى النبي صلى الله عليه وسلم يشكو الفاقة، فأمره أن يتزوج.
=========================
من زنى زني به ولو بحيطان داره
الزنا دين يقضى من محارم الرجل
============================
خير الأمور أوسطها
===============================
من قال أنا عالم فهو جاهل
===============================
أصابت امرأة وأخطأ عمر
=============================
إن الله لا ينظر إلى الصف الأعوج؟
==========================
إذا فتح الله عليكم مصر فاتخذوا فيها جندا كثيراً، فذلك الجند خير أجناد الأرض، فقال له أبو بكر: ولم يارسول الله؟ قال: لأنهم وأزواجهم في رباط إلى يوم القيامة.
================================
الناس مستوون كأسنان المشط ليس لأحد على أحد فضل إلا بتقوى الله
====================================
اذكروا محاسن موتاكم
=====================================
من لم تنهه صلاته عن الفحشاء والمنكر لم يزدد من الله إلا بعدًا
===================================
الجنة تحت أقدام الأمهات من شِئن أدخلن ومن شئن أخرجن
والصحيح
فالزمها فإن الجنة تحت رجليها.
==================================
اطلبوا العلم ولو بالصين، فإن طلب العلم فريضة على كل مسلم
========================================
إياكم وخضراء الدمن قالوا: يا رسول الله وما خضراء الدمن؟ قال: المرأة الحسناء في المنبت السوء."
========================================
وهو شهر أوله رحمة وأوسطه مغفرة وآخره عتق من النار
======================================
تخيروا لنطفكم فإن العرق دساس
==================================
من لم يهتم بأمر المسلمين فليس منهم
======================================
كما تكونوا يولى عليكم
==================================
وهناك الكثير والكثير ..
لم أضع هذا الموضوع تشكيكا في سنة نبينا الكريم ..صلوات الله وسلامه عليه
انما دعوة لكم أحبتي .. انتبهوا بارك الله فيكم ... ولاتنقلوا كل شيء قبل أن تتثبتوا
انا عارف اني كتبت قبل كده عن موضوع النقل ده ... لكن لما وصلتني الرسالة النهاردة .. ودورت ولقيت الهوايل اللي فوق .. قلت اشارككم معايا فيها
الخميس, 12 اكتوبر, 2006
بدأت الآن لحظات الجد في الدراسة .. وطلعنا الجبل والحمد لله
جامعة الفهد تتكون من جزئين .. المنطقة السكنية والمطاعم والخدمات .. ومباني السنة التحضيرية .. وهذه كلها موجودة على مستوى الأرض ..
والجزء الثاني هو مباني الكليات الدراسية .. وتقع كلها أعلى الجبل ... لها 3 طرق معبدة للوصول اليها من مشيا من المنطقة السكنية .. وكل الطرق الثلاثة كانوا بيهدوا الحيل .. اثنين منهم عبارة عن سلالم من تحت لفوق ..يعني خمس دقايق عملية رياضة وطلوع سلالم ..
المهم .. كنا لما نحب نروح محاضرتنا ..كنا " بنطلع الجبل" .. وهو رمز يكفي للدلالة على أنك صاعد الى محاضرة ما .. وأنك طالب في الجامعة ..مش في الأوريا :)
دخلت الجامعة وأنا أعلم أنني أريد دراسة الهندسة .. وأعلم أنه من بين كل كليات الهندسة في الجامعة .. غير مسموح لي بالالتحاق الا بهندسة النظم والمعلومات أو هندسة الحاسب الالى .. طبقا للقوانين الخاصة بنا كأجانب
بناء عليه ..كنت قد قررت أن أكمل مسيرة أخي .. وأدخل هندسة النظم والمعلومات ... واستبعدت تماما عن تفكيري كلية هندسة الحاسب الآلي
منذ أن دخلت الجامعة .. وانا اضع امام عيناي كشف درجات أخي ... كان هدفي أن أكون مثله في كل المواد .. يعني لو انا مشيت على طريقه وجبت نتايجه ..هانجح واعدي والحمد لله ... نظرا لان الحديث عن صعوبة الجامعة كان يصيبني بالاحباط .. وكان لا بد من وضع خطة لتجاوز سنوات الدراسة الصعبة
بدأت المسيرة في فصل الصيف حيث قررت دراسة الفصل الصيفي لعام 1993م ..طبعا بضغط من الوالد حفظه الله ..هتنزل مصر ليه ..لازم تجد وتجتهد وتخلص بسرعة .. المهم ..اخذت صيفي ... ماكانش بطال .. عدى على خير ...
ورجعت الرياض اسبوعين ورجعنا بعد كده للجامعة
أنهيت السنة الأولى في الجامعة بنجاح ... كل المواد كانت نتائجها جيدة جدا ..ماعدا الفيزياء 101
ودي ليها حكاية .. هاخليها حكاية الموضوع ده ..وانهي بيها كلامي عن السنة الاولى الجامعية
مادة الفيزياء 101
كانت مادة صعبة جدا ... بالرغم من أنها كانت تحتوي على مواضيع درسناها بشكل ما في الثانوية .. لكن عدد المواضيع كثير ... وباللغة الانجليزية .. كنت اقعد ساعة علشان اترجم صفحة وافهمها
وطبعا لو تكاسلت قليلا عن دراستها ومراجعتها ..هتتبهدل ومش هتلحق .. وده اللي حصل معايا .. ودخلت الامتحان النصفي وماكانتش النتايج حلوة ... ووصلنا للنهائي .. وكان لازم اختار ..يااضيع وقتي كله فيها .. يااذاكر بقية المواد
من حظي .. وفي ذلك الفصل الدراسي .. نزل قرار بأنه من حق أي طالب يجيب نتيجة أقل من جيد في أي مادة ..انه يعيدها تاني .. وهتنحسب له نتيجة الاعادة .. وتنشال النتيجة الاولية من المعدل
هتفضل مكتوبة في الشهادة ..لكن اللي ينحسب في النقاط هي نتيجة الاعادة
وطبعا .عرفتوا خلاص قراري كان ايه :) قررت اني اعيد المادة ..
دخلت النهائي .. وانا محتاج اني اجاوب صح على 5 اسئلة علشان اجيب درجة المقبول ... والمشكلة اني لو جاوبت على 15 سؤال صح .. كنت هاجيب جيد .. وكان فيه امل في جيد جدا اذا اجبت 30 سؤال صح أو اكثر
المجموع كان 35 سؤال
الامتحان كان عبارة عن اختيارات ..يعني سؤال ومعاه خمس اختيارات ..وانت تختار الاجابة الصح ..وماكانتش الاجابة الغلط تشيل اجابة صحيحة زي بعض الامتحانات التانية
دخلت اللجنة .. مسكت الورقة ..حليت 5 اسئلة اللي انا متأكد انهم صح ... وطبعا كان لازم احل الباقي ..
فمسكت الاسئلة .. اللي انا متأكد من اجوبته كنت احله غلط .. تقريبا انتهيت من 20 سؤال بالشكل ده ..
باقي 15 مش عارف اعمل فيهم ايه .. وياترى ممكن الحظ يضرب معايا والاجابات اللي اختارها تكون صحيحة .. وزي ماقلتلكم ..مش كنت عايز ال جيد
قعدت اشوف ايه الاجابة اللي ممكن يغلب عليها انها تكون خاطئة ..واحطها ..
انتهيت تقريبا بعد ساعة ..في زمن امتحان 3 ساعات ..
بصيت حوالي ..الناس غرقانة في عرقها .. وانا طبعا ريلاكس جدا
حاولت اسلم في الاول بعد ماحليت الخمسة اللي عايزهم ..مارضيوش .. قالوا لازم تعبي الباقي
حاولت اسلم بعد الساعة .. مارضيوش ..قالوا راجع ..فيه حد برضه يطلع بعد ساعة في مادة زي دي
ياجماعة وانتو مالكم ..انا حر .. ابدا مارضيوش ..
حطيت الورقة قدامي مقلوبة ..واستنيت لغاية ماايجو طردوني :)
وطلعت .. وعديت بمقبول .. ولقيت نفسي جاوبت 9 اسئلة صحيحة في النهائي :)
وفعلا عدت المادة في السنة الثانية ..واخذت امتياز A ..
نراكم في السنة الثانية الجامعية
الثلاثاء, 10 اكتوبر, 2006
زي ماوعدتكم ... ادي قصة المقبرة واللي حصل فيها
طبعا حابب احكيها ..يمكن بعد سنين الدنيا تختلف ..وارجع افتكر اللي حصل
يوم الخميس اللي فات ..لما كنت في الرياض .. رحت الى مقبرة النسيم - في الرياض - لزيارة الوالدة رحمة الله عليها ..والدعاء لها
مقبرة النسيم عبارة عن أرض كبيرة خالية .. مليئة بالحفر المتجاورة .. كل حفرة تقريبا بعمق 2 متر .. وفي نهايتها جزء صغير للداخل .. يتم انزال الميت اليه ..وتغطية هذه الفتحة الداخلية بأحجار لبنية .. ثم احكام اغلاق هذه الفتحة ..والميت بداخلها .. عن طريق الطين .. تراب وماء .. ثم يتم وضعه على جوانب الاحجار اللبنية ..كي يغلق كل المسامات ... وبعدين يتم اغلاق الحفرة الرئيسة بالتراب إلى أن تصل الى مستوى سطح الأرض ... وفي النهاية يتم وضع حجرين لبنيين في طرفي القبر .. واحاطتهما بالتراب ..ثم وضع كميات من الحجر الصغير فوق كل هذا ..كي يثبت التراب ولا يتحرك بفعل العوامل الجوية المختلفة ..
لو نظرت ..لوجدت القبور كلها متشابهة .. كلهم بنفس الطريقة .. لاتفرق بينهم وبين بعضهم ..
يوم دفن الوالدة رحمها الله ..كنا مشغولين جميعا بما نحن فيه .. ولم نركز كثيرا على مسألة تشابه القبور .. ومع نهاية مراحل الدفن ..فوجئنا بأحد المتواجدين - بارك الله فيه - وهو يمسك بعباءتها رحمة الله عليها ويلفها حول الشاهد الاول ..الحجر اللبني الاول .. ثم بالكفن الابيض ويلف به الشاهد الثاني ..
بتعمل كده ليه ..قال علشان بكرة تعرفوا المكان لما تحبوا تزوروها .. شخصيا ماركزتش كتير في كلامه
المهم ..يوم الخميس اللي فات لما حبيت اروح .. افتكرت حكاية مكان القبر ..هاعرفه ازاي .. أخوي الصغير طمني ..وقالي هتلاقي الكفن والعباية زي ماهم ... قلت كويس ..ونويت اني اعمل حاجة تانية تخلي القبر معروف اكتر لينا ..
اخذت معايا حبل .. على اساس اني اربط الكفن والعباءة بيه ..علشان مايطيروش مع تقلبات الجو ..
واخذت معايا مصحف علشان اقرا الجزء بتاعي اليومي هناك ..وانا مع امي رحمة الله عليها ..
وتوكلت على الله ورحت .. سلمت عليها ..ودعيت ليها ..ويارب يتقبل ...
وبدأت العمل .. طلعت الحبل .. وبدأت الف الكفن بيه .. مانتبهتش الا واحد جاي وماسك ايدي ..
خير فيه ايه ... ايه اللي انت بتعمله ده ..حرام عليك ..لايجوز ان تضع فوق القبر أي شيء مسه النار ..
قلتله يعني ايه .. ماالكفن والعباءة نفس الحكاية ..مستهم النار ..قالي ماهم غلط هم كمان ..كله يتشال
قلتله برضه يعني ايه ..اعلم القبر ازاي .. اجيب بوية وادهن الشاهدين والا اجيب بلوكة واحطها فوق الشاهدين .. والاجابة ..كله ماينفعش ..يفضل زي ماهو ..عد القبور اللي قبلها واللي جنبها ..واحفظها بالشكل ده .. قلتله ياسلام ..ماكل شوية المساحة بتزيد وتختلف ..
ماليش دعوة ..هي دي السنة ..وانا نصحتك ..
قلتله ياسيدي الله يبارك فيك ..هاسأل الشيخ واشوف .. واذا أأكد كلامك هاشيل على طول
راح باصص لي بصة حلوة .. تسأل الشيخ ..!!! ماحنا قلنالك المفيد .. قلتله لا معلش .. انا برضه احب اتأكد ..
مشي طبعا وهو هياكلني ..
كملت انا الحبل على شاهد واحد .. الا واحد تاني جاني ..
عايز تعلم القبر ..انا اقولك احسن طريقة ازاي ..تيجي من قدام هناك وتعد ... وسهلة ..انا عامل كده ومافيش مشاكل ..قلتله ياسيدي وانا كمان اللي باعمله مافيهوش مشاكل ..
قالي انا خايف انه واحد يجي ويشيل كل ده ..وانت تكون مش عادد وتتوه بعد كده ..
قلتله يبقى وقتها ..ربنا هينتقم لي منه .. وذنبي في رقبته الى يوم الدين
مشي ..وبرضه مش عاجبه ...
خلصت الحبل ..و جلست ادعي شوية ... وبعدين مسكت المصحف اقرا قرآن ..
طبعا المسافة بين القبر والقبر صغيرة جدا .. فانا واقف وماسك المصحف وباقرأ ..
فوجئت بواحد تالت .. السلام عليكم ... وعليكم السلام ..
هل لديك ياأخي الكريم دليل بأن قراءة القرآن تجوز في المقابر ... قلتله ..وهل لديك ياأخي انت دليل على انها لاتجوز في المقابر ..
مزمز شفايفه .. ويصلي بصه كده ..وبعدين قال.. ياخي بس لايجوز ..الشيوخ بيقولوا كده ..قلتله ياخي وانا سائل ..وقالوا اقرا ..
مين الشيخ ده اللي قالك كده ..قلتله ياسيدي مش وقته انك تمحص ايمان الشيوخ دلوقتي .. اذا عندك دليل هاته ..مش عندك ..شكرا لك ..
يااخي ..انا باحبك ..وعايزك تعمل الصح .. والحبل ده غلط ..والعباءة والكفن غلط ..والقرآن اللي بتقراه غلط .. تعال هنا ادعي بس ..ولاترفع يدك بالدعاء .. وبعدين مش لازم تدعي قدام قبرها علشان تحرص على تعليمه بعلامة ..ادعي من اول المقبرة هناك والدعاء هيوصل
قلتله مانا لو دعيت وانا في بيتي هيوصل ..نقفلها ونرتاح ..:)
في النهاية .. قلتله خلاص ..هاسأل واتأكد ان شاء الله ..وجزاك الله خير
برضه مشي ..وهو عايز ياكلني ..
وبس .. كفاية كده .. خلصت اللي عايزه ومشيت ..ربنا يسامحهم ..ضايقوني وخلوني انشغل عن اللي انا رايحله ..
وربنا يستر .. مايعملوش حاجة في الحبل
الاحد, 08 اكتوبر, 2006
اليوم .. وبعد مرور تسعة أشهر ..وثمانية أيام على التحاقي بوظفتي الحالية
صدر قرار بإنهاء هذه المهمة .. والتحول الى مهمة جديدة
مهمة جديدة ..يعني تدريب من جديد .. ومهام وظيفية جديدة .. بالمختصر المفيد ..يعني كأني انتقلت الى عمل جديد .. بس الفرق انه مش في شركة جديدة
منذ تخرجي من الجامعة ..وانا لا أمضي وقتا كثيرا في مكان واحد ..وفي عمل واحد .. عندما أتقن ماأقوم به ..أبدأ بالتململ .. والبحث عن شيء جديد أتعلمه وأقوم به
لدرجة أنني كنت اقول لنفسي بعد قرب مرور العام الأول من أية وظيفة ..ياترى الوظيفة الجاية ايه :)
ولذا .. عملت في ستة مناصب مختلفة . منذ تخرجي عام 1998م
واليوم ..منصب جديد ..ومهمة جديدة .. وتحدٍ جديد
وهذه حلاوة شركتي ... فالعمل فيها عبارة عن مهمات .. عندما تنهيها ..تنتقل الى غيرها ...
الطبيعي ان مدة المهمة الواحدة تكون من سنتين الى ثلاث سنوات ... والحمد لله انا معايا انتهت في تسعة أشهر فقط
من الان انا في شوق للمهمة القادمة ...اوعى تفهموني غلط ..مش قصدي المهمة دي ..انا قصدي اللي بعدها ;)
السبت, 07 اكتوبر, 2006
أكيد وحشتكم ..صح .. <== ولا حد اصلا انتبه انك غايب
ماعلينا
قررت قضاء اجازة نهاية الاسبوع الماضي .. 5 و 6 أكتوبر .. أنا وأسرتي ... في رحاب مدينتي الحبيبة ..الرياض
مسقط رأسي .. وحاملة رفات أمي
آخر مرة نزلت فيها الرياض كان منذ خمسة أسابيع .. وقت وفاة الوالدة رحمها الله
المهم
الرياض هي عاصمة المملكة العربية السعودية .. تقع في وسط المملكة .. وتبعد 400 كم غرب مدينة الخبر الت